Kókshetaýda ashylǵan medıtsına fakýltetinde alǵashqy dáris bastaldy
KÓKShETAÝ. QazAqparat - Sh.Ýálıhanov atyndaǵy Kókshetaý memlekettik ýnıversıtetinde ashylǵan medıtsına fakýltetinde alǵashqy dáris bastaldy, dep habarlaıdy QazAqparat tilshisi.
Aqmola oblysynyń ákimi Málik Myrzalınniń tóraǵalyǵymen óńirde medıtsınalyq fakýltettiń ashylýyna baılanysty jumys keńesi ótti. Bul elimizdiń soltústik oblystaryndaǵy tuńǵysh medıtsınalyq fakýltet bolyp otyr. Ony ashýdaǵy basty maqsat - osy kúni óńirde qalyptasqan medıtsına salasyndaǵy mamandyq ıeleriniń tapshylyǵyn sheshý. Bıylǵy oqý jyly medıtsınalyq mamandyqtar boıynsha 172 stýdent qabyldanǵan. Onyń ishinde 50 stýdent oblys ákiminiń granty, 18 stýdent QR Bilim jáne ǵylym mınıstrliginiń granty jáne 100-den astam stýdent kelisimshart boıynsha oqıdy. Medıtsınalyq fakýltet úshin arnaıy aýdıtorııalar da bólindi. Morfologııa, fızıologııa jáne patologııa kafedralary jıhaz jáne kompıýterlermen jabdyqtaldy. Oǵan qosa, qosymsha ǵımarat ta berildi.
Qazirgi kezde ǵımarat tehnıkalyq baqylaýdan ótkizilip, qaıta josparlaý boıynsha sheshim qalalyq sáýlet bólimine joldandy. Anatomııa jáne adam fızıologııasy, sondaı-aq, sındromdy dıagnostıkalaý jáne ishki aýrýlar klınıkasy boıynsha medıtsınalyq kabınette oqytý úshin 2 tsıfrlyq baǵdarlama satyp alyndy. Ol úshin IT- apparatýrasy bar kabınet bólindi. 17 mıllıon teńgege «Vırtýaldy klınıkalyq akademııa» mýltımedııalyq synyby bar baǵdarlamany memlekettik satyp alý boıynsha baıqaý júrgizilýde. Oǵan qosa, 12 mıllıon teńgege oqýlyqtar satyp alý úshin baıqaý ótti.
Eń basty jańalyq, ol ýnıversıtettiń Úndistan eliniń 150 stýdentin oqytý týraly kelisimshart jasaýy. Olardyń aldyńǵy legi osy aıdyń sońynda kele bastaıdy. Olardyń oqýy men jatar ornynyń qarjysyn Úndistan úkimeti tóleıtin bolady. Al, ınternatýranyń birinshi kýrsynda barlyǵy 12 adam oqysa, onyń altaýy grant boıynsha. Osy oraıda aımaq basshysy Málik Myrzalın tıisti basqarmalarǵa ınternderdiń qalǵan jartysyna oblys ákiminiń granty bólý týraly tapsyrma berdi.
