Kókshetaýda áriptesin óltirgen polıtseıge qatysy tergeý óndirisi aıaqtaldy
KÓKShETAÝ.QazAqparat - Kókshetaýda áriptesin aıýandyqpen óltirgeni úshin aıyptalyp otyrǵan burynǵy polıtsııa maıory Jánibek Baımurzınge qatysty tergeý óndirisi aıaqtalyp, qylmystyq is materıaldary kúdikti men onyń qorǵaýshysyna tanysý úshin joldandy, dep habarlaıdy «QazAqparat» HAA tilshisi ІІD baspasóz qyzmetine silteme jasap.
Budan buryn habarlanǵanymyzdaı, Kókshetaý qalalyq sotynyń 2017 jylǵy 10 aqpandaǵy qaýlysyna sáıkes, Baımurzınge qatysty qamaýda ustaý túrindegi bultartpaý sharasy 27 naýryzǵa deıin uzartylyp, tergeý amaldary júrgizilip jatqan bolatyn. Jaqynda kúdiktige qatysty tergeý óndirisi aıaqtalyp, qylmystyq is materıaldary kúdikti men onyń qorǵaýshysyna tanysý úshin joldanyp otyr.
«Tergeý óndirisi aıaqtaldy. Qazirgi kezde atalǵan qylmystyq is materıaldary kúdikti men onyń qorǵaýshysyna tanysý úshin joldandy. Kúdikti qamaýda ustaý merzimi onyń atalǵan qylmystyq ispen tanysý merzimimen anyqtalatyn bolady. Sodan keıin ǵana baryp, is sotqa joldanady», dep túsindirdi baspasóz qyzmeti.
Eske sala keteıik, 2016 jyldyń 25 jeltoqsan kúni Kókshetaý qalalyq ІІB qyzmetkeri, aǵa leıtenant Darhan Elamanov kezekshilikten shyqqan soń, izim-qaıym joǵalyp ketedi. Keıin Darhandy jabylyp izdegen jaqyndary men oblystyq ІІD qyzmetkerleri birer kúnnen keıin onyń múrdesin qala shetindegi Kenesary aýylynyń mańynan tabady. Kúdiktini ustaý úshin polıtseıler marqumnyń uıaly telefonyn tekserip, sońǵy ret kimdermen sóıleskenin anyqtaıdy. Keıin 26 jeltoqsanda Aqmola oblystyq ІІD qyzmetkerleri jedel-izdestirý sharalary barysynda 2016 jyldyń 25 jeltoqsanynda joǵalyp ketken aǵa leıtenant Darhan Elamanovty óltirdi degen kúdik boıynsha polıtsııa qyzmetkeri 32 jastaǵy maıor Jánibek Baımurzındi ustaıdy. Sol kezde kúdiktiniń bergen túsiniktemelerine qaraǵanda, ol bul qylmysqa jek kórýden barǵan kórinedi.
Osylaısha, kúdikti eki aıǵa ýaqytsha ustaý oqshaýlaǵyshyna qamalyp, ústinen QR QK «Adam óltirý» baby boıynsha sotqa deıingi óndiristik is qozǵalady. Keıin Kókshetaý qalalyq sotynyń 2017 jylǵy 10 aqpandaǵy qaýlysyna sáıkes, Baımurzınge qatysty qamaýda ustaý túrindegi bultartpaý sharasy 27 naýryzǵa deıin uzartylady. Qazirgi kezde kúdiktige qatysty tergeý óndirisi aıaqtalyp, qylmystyq is materıaldary kúdikti men onyń qorǵaýshysyna tanysý úshin joldanyp otyr.
