Kókshetaýda ardagerler uıymdary shyǵarmashylyq ujymdarynyń gala-kontserti ótti
«Kókshetaý» mádenıet saraıynda uıymdastyrylǵan sharaǵa aımaq basshysy Málik Myrzalın qatysyp, quttyqtaý sóz sóıledi.
«Bul kúnderi barlyq elimiz boıynsha qarttardy qoldaý aılyǵy keń kólemde ótkizilip jatyr. El Prezıdenti Nursultan Nazarbaevtyń qamqorlyǵynyń arqasynda aǵa býynǵa laıyqty qurmet, iltıpat kórsetilýde. Bizdiń ardagerlerimiz kúni keshe ǵana ózderiniń eńbeksúıgishtigi arqasynda qoǵam baılyǵyn eselese, búgingi kúni elimizdiń birligine, tutastyǵyna yqpal etip otyrǵan ardaqty jandar,-dedi oblys ákimi óz sózinde.
Kontserttik baǵdarlama shymyldyǵy Egindikól aýdanynyń «Ájeler», Eńbekshilder aýdanynyń «Aq jaýlyq» vokaldy ansamblderi men «Kókshetaý» halyqtyq bı ansambliniń orta tobynyń oryndaýyndaǵy quıqyljyǵan halyq ánderimen ashyldy. «Týǵan jer» ánin oryndaǵan Stepnogor qalasynan kelgen belgili ánshi Nasıpolla Nazarulynyń, R.Gamzatovtyń «Jýravlı» ánin oryndaǵan Arshaly aýdanynyń ánshisi Gross Lýkıannyń aıryqsha áýezdi únderi kópshilikti tánti etti. Qorǵaljyn aýdanynan kelgen «Retro» vokaldy-aspaptar ansambli halyq áni «Qudashany» oryndaǵan sátte samaılaryn aq qyraý shalǵan ardagerler shalqyǵan án lebimen birge terbelip, jastyq shaqtaryn eske alysty. Kontsert barysynda Esil aýdanynyń Svobodnoe eldi mekeniniń ardagerler klýby hory, Aqkól aýdanynan kelgen «Aqkól sazy» folklorlyq ansambli, Kókshetaý qalalyq «Dostar» mádenıet saraıy janyndaǵy «Sýdarýshkı» halyqtyq-folklorlyq vokaldy ansambli tamasha óner kórsetti. 
Eske sala keteıik, osy kúni Aqmola oblysynda 111,5 myń egde adamdar bar bolsa, onyń 95-i Uly Otan soǵysynyń ardagerleri, 6 myńǵa jýyǵy tyl eńbekkerleri.
Barlyq qarııalar bul kúnde arnaıy áleýmettik kómekpen qamtylǵan. 26 áleýmettik kómek bólimsheleri ardagerlerdiń úılerinde kómek kórsetedi. 
Jyl basynan beri kommýnaldyq qyzmet úshin 11 mıllıon teńge kóleminde kómek kórsetildi.
Búgingi kúni qalalar men aýdandardyń bıýdjeti esebinen 5750 adamǵa 26,8 mıllıon teńge kóleminde bir mezgildik materıaldyq kómek berildi. Jalpy, oblys boıynsha áleýmettik kómekpen 61 566 adam qamtylyp otyr.
