Kókshetaýda «Antikor ortalyǵy» servıstik ortalyǵy ashyldy

KÓKShETAÝ. QazAqparat - QR Sybaılas jemqorlyqqa qarsy is-qımyl agenttiginiń tóraǵasy Alık Shpekbaev jumys saparymen Aqmola oblysynda boldy, dep habarlaıdy QazAqparat tilshisi.

Vedomstvonyń habarlaýynsha, sapar barysynda agenttik tóraǵasy sybaılas jemqorlyqqa qarsy is-qımyl jónindegi aýmaqtyq departamenttiń «Antikor ortalyǵy» servıstik ortalyǵynyń ashylýyna qatysyp, sóz sóıledi.

Sondaı-aq, sharaǵa Aqmola oblysy ákimi Ermek Marjyqpaev, oblystyq sottyń, quqyq qorǵaý jáne arnaıy memlekettik organdardyń basshylary, quqyq qorǵaý organdarynyń ardagerleri men qoǵam qaıratkerleri qatysty.

«Memleket basshysy Qasym-Jomart Toqaevtyń «Halyq únine qulaq asatyn memleket» tujyrymdamasyn júzege asyrý sheńberinde Agenttik memlekettik organdardyń ashyqtyǵy men qoljetimdiligin arttyrý boıynsha úlken jumys júrgizýde. Bizdiń qyzmetimiz ben bastamalarymyz ádildik, parasattylyq jáne senim prızmasy arqyly iske asyrylady», - dep atap ótti Alık Shpekbaev «Antikor ortalyǵy» servıstik ortalyǵynyń ashylýynda.

Servıstik ortalyqtyń birinshi qabatynda kelýshilerdi qabyldaıtyn arnaıy kabınetter ornalasqan. Azamattardy jaıly kútý úshin balalarǵa arnalǵan oınaý alańy, beınerolıkter kórsetiletin LED-tv ekrandarymen jabdyqtalǵan. Ǵımarattyń ekinshi qabatynda «Open space» formatyndaǵy kabınetter men departamenttiń baspasóz ortalyǵy bar.

Sonymen qatar, shara barysynda departamenttiń sybaılas jemqorlyqqa qarsy qyzmeti týraly ımıdjdik beınerolıkter kórsetilip, «Halyq baqylaýshysy» mobıldi qosymshasynyń jobasy usynyldy.

«Mobıldi qosymshanyń osy jobasy sheteldik tájirıbeni eskere otyryp, Agenttiktiń ashyqtyǵy men qoljetimdiligi úshin ázirlendi. Qazirgi zamanǵy adam mobıldi qurylǵyny kóbirek paıdalanatynyn eskere otyryp, qosymsha Sybaılas jemqorlyqqa qarsy is - qımyl quraldaryn jedel jáne tıimdi paıdalanýǵa múmkindik beredi», - dep túsindirdi departament qyzmetkeri Medet Turybaev.

Aıta ketý kerek, servıstik ortalyq azamattarǵa jedel jáne jaıly jaǵdaılarda keńes alýǵa, al memlekettik qyzmetshilerge myqty uıymdastyrýshylyq mádenıetti qalyptastyrýǵa múmkindik beretin «Open space» jáne «Front office» formatyndaǵy jumystyń tıimdi úılesimi bolyp tabylady.

Shara sońynda jańadan ashylǵan servıs ortalyǵy ǵımaratynyń aýmaǵynda qolaıly ekologııalyq jaǵdaılar jasaý prızmasy arqyly adamgershilik qasıetterdi sińirý úshin shyrsha aǵashtary otyrǵyzyldy.