Kókshetaýda «Ana úıinde» turatyn áıelder medıtsınalyq maska tigýde
«Ana úıi» úılestirýshisi kópbalaly ana Quralaı Jumabekovanyń aıtýynsha, dákeden medıtsınalyq maska tigýmen taǵdyr tálkegine túsken alty ana aınalysýda.
«Maska tigemiz dep múlde oılaǵan joqpyz. Mektepte muǵalimder balalarymnan maska ákelýdi talap etti. Ol dárihanalarda bolmaǵan soń ózime qolmen tigýge týral keldi. Keıin suranys túse bastady. Osylaısha, Ana úıindegi alty ana jappaı tige bastady.», - deıdi Quralaı Jumabekova.
Onyń aıtýynsha, búgingi kúni 600 maskany obys ortalyǵyndaǵy áleýmettik mekemeler men jeke adamdar satyp alǵan.
«Maska tigýdi qolǵa almas buryn TJD-dan maskanyń standartyn aldyq. Alty qabat dákeden turatyn maskany birneshe ret qoldanýǵa bolady. Búgingi kúnge deıin qaladaǵy áleýmettik mekemeler men jeke adamdarǵa 600 maskany sattyq. Mundaǵy bir maskanyń quny 120 teńge. Taǵy 3 myń maskaǵa suranys tústi, áli de suranys túsýde. Ózimiz úlgermeıtin bolǵandyqtan, úıde bala kútýmen otyrǵan analardy jaldadyq. Budan bólek, dákeni qıyp kómektesip otyrýǵa 50 eriktini jaldadyq», - dep tolyqtyrdy Quralaı Jumabekova.
Onyń sózinshe, qoldan tigilgen maskany satyp alǵan adam ózin vırýstan qorǵap qana qoımaıdy, «Ana úıinde» turyp jatqan ana men balaǵa qoldaý kórsetpekshi.
Aıta keteıik, Kókshetaý qalasynda turatyn «Kúmis alqa» ıegeri Quralaı Jumabekova týǵan balalaryna ǵana emes, ózgeniń balalaryna da jeterlikteı analyq mahabbatqa toly úlken júrek ıesi. Alty balany dúnıege ákelip, taǵy bes balany baýyryna basqan ol qoǵamdyq jumystarǵa da belsendi aralasýda.
