Kókshetaýda Alǵys kúnine oraı «Rııasyz alǵys» chellendji bastaldy
Vedomstvonyń málimetinshe, óskeleń urpaqty dostyqqa, bir-birine degen qurmet pen izgilikke tárbıeleý maqsatynda uıymdastyrylǵan chellendjge oblys ortalyǵynyń joǵary jáne orta arnaýly oqý oryndarynda oqıtyn ózge etnos jastary qatysýda. Kóktemniń alǵashqy merekesi árbir qazaqstandyqty jaqyndary men aınalasyndaǵylarǵa rııasyz alǵysy men erekshe iltıpatyn bildirýge shaqyrady.
«Qaıyrymdylyq dástúri men ózara yntymaqtastyqty ulyqtaıtyn Alǵys aıtý merekesiniń tárbıelik máni zor. Ásirese, Qazaqstan jastarynyń dostyq pen beıbitshilik aıasyndaǵy dástúrdi jalǵastyrýǵa belsene qatysqany erekshe qýantady», deıdi Aqan seri atyndaǵy joǵary mádenıet kolledji dırektorynyń orynbasary Gúlnár Qadyrálıeva.
Uıymdastyrýshylardyń aıtýynsha, bul chellendj burynǵydan ózgeshe. Atap aıtqanda, stýdent jastar ózderi oqyp jatqan mamandyqtarymen baılanystyra otyryp, ata-analaryna, ustazdar qaýymyna, jora-joldastaryna, qazaq eline ystyq yqylastaryn jetkizýde, sondaı-aq memlekettik tildi esh kedergisiz meńgerýine zamanaýı múmkindikter men jaǵdaı jasap otyrǵan egemen eli Qazaqstanǵa da rııasyz alǵystaryn bildirip, chellendjdi kelesi oqý oryndarynyń bilim alýshylaryna joldaýda. Osylaısha, joǵary jáne orta oqý oryndarynyń jastary kórikti kóktemdi ózine ári aınalasyndaǵylarǵa rızashylyqpen qarsy alýda.
Aıta keteıik, chellendjge Kókshetaý qalasynyń 2 joǵary oqý orny men 9 orta arnaýly kolledj stýdentteri qatysýda.
