Kókshetaýda álem chempıonyn óltirgender sottaldy
KÓKShETAÝ. QazAqparat - Kókshetaýda paýerlıftıngten álem chempıony Evgenıı Galýzınskııdi óltirgender sottaldy, dep habarlaıdy QazAqparat tilshisi.
Oblystyq sottyń baspasóz qyzmetiniń málimeti boıynsha, aǵymdaǵy jyldyń 27 shildesinde alqa bılerdiń qatysýymen ótken sot protsesinde tórt aıyptalýshynyń biri Dospaev QR QK 99-bap boıynsha (adam óltirý) kinəli dep tanylyp, 15 jylǵa bas bostandyǵynan aıyrý jazasy taǵaıyndaldy. Oǵan qosa, ol zardap shegýshi jaqqa 2 mıllıon teńge moraldyq shyǵyndy óteıtin boldy. Al qalǵan taǵy eki aıyptalýshy buzaqylyq jasaǵany úshin aldaǵy 2 jylyn temir tordyń ar jaǵynda ótkizedi jəne árbireýi 300 myń teńgeden moraldyq shyǵyndy óteıdi. Tórtinshi kúdikti kinəssiz dep tanyldy. Sot úkimi kúshine engen joq.
Eske salaı keteıik, osyǵan deıin tanymal sportshy paýerlıftıngten álem chempıony Evgenıı Galýzınskııdiń buzaqylardyń qolynan qaza bolǵany týraly aqparat jarııalaǵan bolatynbyz.
Polıtseılerdiń málimeti boıynsha qaıǵyly oqıǵa aǵymdaǵy jyldyń 14 naýryzynda, túngi 03:00-derde Kókshetaý qalasyndaǵy avtoqalashyq shaǵynaýdanynda oryn alǵan. Dosymen birge úıine bara jatqan 25 jastaǵy sportshyny bir top jas jigit toqtatady. Araqqa sylqııa toıyp alǵan jigittermen birden sózge kelip, olardyń arasynda tóbeles shyǵady. Bes jigit Evgenıı men onyń dosyn soqqyǵa jyǵady. Dosy qaskóılerden sytylyp shyǵyp, sol mańdaǵy «Roma» dúkenine kómek shaqyrýǵa júgiredi. Osy kezde buzaqylardyń biri sportshyǵa birneshe jerden pyshaq suǵyp úlgeredi. Alǵan aýyr jaraqattan Evgenıı kóp uzamaı kóz jumǵan.
Oqıǵa ornyna dereý jetken polıtseıler atalǵan dúkendegi beıne jazbany tekserip, kóp uzatpaı kúdiktilerdi qolǵa túsiredi. Kúdiktiler - 1997-1999 jylǵy stýdentter. Onyń arasynda 1999 jylǵy kúdikti qylmysyn moınyna alyp, ústinen QR QK 99-babynyń 1-bólimi boıynsha (adam óltirý) sotqa deıingi is qozǵaldy. Al, qalǵan kúdiktilerge qatysty kelip, tirkelip otyrý sharasy qoldanylyp, QR QK 293 -babynyń 2-bólimi boıynsha sotqa deıingi is júrgizilgen bolatyn.
