Kókshetaýda «Aqmola - adaldyq alańy» jobasyn júzege asyrý barysy talqylandy
KÓKShETAÝ. QazAqparat - Kókshetaýda «Memlekettik apparattyń tıimdi jumysyna qol jetkizýdiń negizgi ustanymdary - ashyqtyq, qoljetimdilik, sapa» taqyrybynda semınar-májilis ótti, dep habarlaıdy QazAqparat tilshisi.
Óńir basshysy Ermek Marjyqpaevtyń tóraǵalyǵymen ótken sharada «Aqmola - adaldyq alańy» jobasynyń mindetteri men júzege asyrý barysy týraly Aqmola oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Bergen Bespalınov aıtyp berdi.
Onyń aıtýynsha, elimiz boıynsha «Jemqorlyqtan ada óńirler» jobasy júzege asyrylýda. Aqmola oblysynda bul joba «Aqmola - adaldyq alańy» ataýymen belgili. Bul joba turmystyq jemqorlyq deńgeıin azaıtýǵa, memlekettik kórsetiletin qyzmetterdiń sapasyn arttyrýǵa, azamattar úshin jaıly jáne bógetsiz jaǵdaılar qurýǵa jáne basshylardyń jaýapkershiligin arttyrýǵa baǵyttalǵan.
Budan bólek, elimizde «Qoǵamdyq baqylaýdyń ınteraktıvti kartasy» jobasy engizilýde. Bul karta halyq úshin alǵash ret bıýdjettik shyǵyndar týraly mańyzdy málimetterdi túsinikti ári qoljetimdi etip, qoǵamdyq baqylaýdyń tıimdi tetigin qurdy. Mysaly, Nur-Sultan qalasynda kez-kelgen turǵyn áleýmettik nysandardyń qurylysyna, jóndelýine jáne qamtamasyz etilýine bólingen qarajattar týraly derektermen tanysa alady.
Sonymen qatar, Bergen Bespalınov memlekettik kórsetiletin qyzmetterdiń sapasyn arttyrý máselesine toqtaldy. Osy oraıda «Tsıfrlyq agent» baǵdarlamasy jumys jasaýda. Memlekettik kórsetiletin qyzmetterdiń merzimderin qysqartý, sonymen qatar elektrondy qyzmetterdiń úlesin arttyrý boıynsha jumystar atqarylýda.
«Biz memlekettik kórsetiletin qyzmetterdi qandaı sapada alǵymyz kelse, dál solaı qyzmet kórsetýimiz kerek. Eger osy ustanymdy únemi alǵa tartatyn bolsaq, halyq tarapynan eshqandaı da shaǵym bolmaıdy, tek qana senim men qurmet bolady» - deıdi Bergen Bespalınov.
Aıta keteıik, búgingi tańda jemqorlyq rýhanı qundylyqtar daǵdarysy jaǵdaıynda, materıaldyq ıgilik rýhanı ıgilikten qymbat bolǵan jaǵdaıda týyndaıdy, jáne osy sebepten «Aqmola - adaldyq alańy» jobasynyń qyzmetinde jemqorlyqqa qarsy qundylyqtardy dáripteý, azamattardyń jemqorlyqqa qarsy joǵary mádenıetin qalyptastyrý, quqyqtyq saýattylyǵyn arttyrý boıynsha jumysqa zor mán beriledi. Osy oraıda oblysta kóptegen jumystar atqarylyp, olardyń ishinde adaldyq dúkenderi keńinen ashylýda.
«Satýshysyz «Integrity Shop» adaldyq dúkenderi adamdardyń jaǵymdy moraldyq qasıetterin, ishki tárbıesi men adaldyǵyn tárbıeleýge baǵyttalǵan. Bul jobaǵa joǵary oqý oryndary, mektepter, kolledjder, memlekettik organdar qosyldy. Bul bastama tipti polıtsııa organdary men sot korpýsy arasynda qoldaýǵa ıe boldy» - deıdi Bergen Bespalınov.
Sondaı-aq, semınarda «Aqmola - adaldyq alańy» jobasynyń kýratory, oblys ákiminiń orynbasary Qanat Ydyrysov «Open Spase» tehnologııasyn engizý jobasy týraly aıtyp berdi.
«Bul sharalar ashyqtyqty jáne halyqtyń senimin arttyrýǵa baǵyttalǵan. Búgingi tańda respýblıkamyzda ashyq keńistikke aýysqan memlekettik organdardyń jaqsy mysaldary barshylyq» - dep atap ótti Qanat Ydyrysov.
