Kókshetaýda «Aqan seri» romanynyń aýdıokitaby jaryqqa shyqty

KÓKShETAÝ. QazAqparat - Kókshetaýda «Bolashaqqa baǵdar: rýhanı jańǵyrý» baǵdarlamalyq maqalasy sheńberinde Sáken Júnisovtiń «Aqan seri» romanynyń jelisi boıynsha jazylǵan aýdıokitap tanystyryldy, dep habarlaıdy QazAqparat tilshisi Aqmola oblystyq ishki saıasat basqarmasyna silteme jasap.

Jobany Aqmola oblysy ishki saıasat basqarmasynyń bastamasymen «Rýhanı jańǵyrý» óńirlik jobalyq keńsesi jáne «El Jastar» teatry júzege asyrdy.

Bul bastamanyń maqsaty — qazaqstandyqtardyń jańa býynyn patrıottyqqa tárbıeleý, otandyq ádebıetke degen qyzyǵýshylyqty arttyrý.

Іs-sharaǵa Aqmola oblysy ishki saıasat basqarmasynyń basshylyǵy, BAQ, mádenıet, qoǵam ókilderi jáne qalanyń stýdent jastary qatysty.

«Qoǵamdyq sanany jańǵyrtý baǵdarlamasyn iske asyrýdaǵy jańa tásilderdi qoldaný, shyǵarmashylyq jáne tıimdi jobalardy jasaý kezeńi qarqyndap keledi. Osyǵan baılanysty biz árqashan bastamashyl jastardy qoldaımyz», - dep atap ótti oblystyq ishki saıasat basqarmasynyń basshysy Altynaı Ámirenova.

Aýdıokitapty jazýǵa shamamen 4 apta ýaqyt ketti. Aýdıokitap «jandy daýyspen» oqý arqyly «Zhakondra Films» stýdııasynda «El Jastar» teatrynyń akterleri jazdy.

«Aýdıokitapta romannyń qyzyqty úzindileri toptastyrylǵan. Bizdiń basty maqsatymyz - jastardy osy jumysqa qyzyqtyrý, kitap oqý mádenıetin qalyptastyrý bolyp keledi» - deıdi Óńirlik jobalyq keńseniń basshysy Qaırat Seıtqazın.

Qazirgi ýaqytta E.Myrzahmetovtyń «Medet» kitabynyń jelisi boıynsha jazba jumystary júrgizilýde.

Sondaı-aq, Aqmola oblysy aqyn-jazýshylarynyń shyǵarmalary negizinde taǵy da 9 aýdıokitap shyǵarý josparlanýda.