Kókshetaýda aǵylshyn páninen úsh alyp qalǵan stýdent qyz ózine qol jumsaǵan
Beıresmı málimetter boıynsha qyz Kókshetaýdaǵy pedagogıkalyq kolledjde oqyǵan. Aǵylshyn páninen emtıhanda tómen baǵa alǵandyqtan osyndaı áreketke barǵan kórinedi.
Aqmola oblystyq PD baspasóz qyzmetinen stýdent qyzdyń qaıtys bolǵanyn rastady jáne osy oqıǵaǵa baılanysty tergeý amaldary júrgizilip jatqandyǵyn atap ótti.
«Qylmystyq kodekstiń 105-baby «ólimge ıtermeleý» boıynsha sotqa deıingi tergeý amaldary júrgizilýde. Aldyn ala anyqtalǵan málimet boıynsha, qyz ózine-ózi qol jumsaǵan jáne artynda jazba qaldyrǵan. Qazirgi ýaqytta bul qylmystyq isti tergeý jalǵasýda», - dedi Aqmola oblysy PD baspasóz qyzmetiniń resmı ókili Ásem Ábdirahmanova.
Aıta ketsek, budan buryn Kókshetaýda úsh qyzdy jezókshelikpen aınalysýǵa ıtermelegen 25 jastaǵy áıel ustalǵanyn jazǵan edik.
