Kókshetaýda aǵaıyndylar ákeleri zeınetaqy alyp júrgen poshta bólimshesin tonaǵan

KÓKShETAÝ. QazAqparat - Kókshetaýdaǵy «Qazposhta» AQ bólimshesin tonaýǵa qatysty tyń derekter anyqtaldy, dep habarlaıdy QazAqparat tilshisi.

Eske sala keteıik, qazannyń 3-i kúni saǵat 11:00-derde Kókshetaý qalasynyń irgesindegi Zastantsıonnyı kentinde belgisiz bireýler «Qazposhta» AQ bólimshesin tonaǵan bolatyn.

Qaraqshylar qoldaryndaǵy oıynshyq tapanshamen poshta qyzmetkerlerin qorqytyp, kassadan 1 mıllıon teńgeni úptep ketti.

Osy oqıǵaǵa baılanysty QR QK 192-babynyń 2-bólimi boıynsha (qaraqshylyq) qylmystyq is qozǵalyp, kúdiktiler, oblys ortalyǵynyń 25-30 jas aralyǵyndaǵy eki turǵyny qolǵa tústi.

«Kúdiktiler 1988 jáne 1993 jyly týǵan aǵaıyndylar. Úlkeni osyndaı qylmysy úshin buryn sotty bolǵan. Kúdiktiler ákelerimen birge turǵan. Olar tonaǵan poshta bólimshesinen ákeleri tıisti zeınaqysyn alyp otyrǵan», dep túsindirdi ІІD baspasóz qyzmetindegiler.

Qazirgi kezde, kúdiktiler ýaqytsha ustaý oqshaýlaǵyshyna toǵytylyp, tergeý amaldary odan ári jalǵasýda.