Kókshetaýda adam ólimimen aıaqtalǵan jol apatyna qatysty úkim shyqty
KÓKShETAÝ. KAZINFORM — Kókshetaý qalalyq soty kólik júrgizýge quqyǵy joq bolsa da rólge otyryp, jaıaý júrginshini qaǵyp ketken áıelge qatysty úkim shyǵardy.
Aqmola oblystyq sotynyń málimetinshe, sot áıeldi jol qozǵalysy erejesin buzyp, abaısyzda adam ólimine sebep boldy dep tanyǵan. Іs QR Qylmystyq kodeksiniń 345-baby 3-bóligi boıynsha qaralǵan.
— Oqıǵa 2026 jyldyń mamyr aıynda Kókshetaýda bolǵan. Sot málimetine sáıkes, S. esimdi azamatsha júrgizýshi kýáligi bolmaǵanyna qaramastan kólikke otyrǵan. Ol úıdiń aýlasyna qaraı burylǵan kezde jaıaý kele jatqan Sh. esimdi azamatshany qaǵyp ketken. Aýyr jaraqat alǵan áıel adam aýrýhanada qaıtys bolǵan. Sotta aıyptalýshy kólik tizginine ne sebepti otyrǵanyn túsindirgen. Onyń aıtýynsha, sol kezde kúıeýiniń densaýlyǵy syr berip, kólikti ózi júrgizýge onyń ruqsatymen otyrǵan, — dep habarlady sot ókilderi.
Kólik ıesiniń júrgizýshi kýáligi joq adamǵa kólikti basqarýǵa bergeni boıynsha is bólek qaralatyn boldy.
Áıel óz kinásin tolyq moıyndaǵan. Sot jaza taǵaıyndaý kezinde onyń jasaǵan isine ókingenin, eki kishkentaı balasy bar ekenin, jábirlenýshi tarapqa keltirilgen moraldyq shyǵyndy ótegenin jáne buǵan deıin eshqandaı jaýapkershilikke tartylmaǵanyn eskergen.
— Jábirlenýshiniń týystary sotta aıyptalýshyǵa eshqandaı materıaldyq nemese moraldyq talabymyz joq dep kórsetken. Olar shyǵyn tolyq ótelgenin aıtyp, áıeldi bas bostandyǵynan aıyrmaýdy suraǵan. Degenmen sot áıeldiń kólik júrgizýge quqyǵy joq ekenin bile tura rólge otyrǵanyn jáne onyń saldarynan adam qaza bolǵanyn eskerdi, — dedi sot ókilderi.
Sot sheshimimen áıel 2 jyl 6 aıǵa bas bostandyǵynan aıyryldy. Biraq onyń eki kishkentaı balasy bolǵandyqtan, jazasyn óteý merzimi 3 jylǵa keıinge shegerildi.
Úkim áli zańdy kúshine engen joq.
Aıta keteıik, buǵan deıin Kókshetaýdaǵy adam ólimine sebep bolǵan jol apatyna qatysty eki qylmystyq is qozǵalǵanyn jazdyq.
