Kókshetaýda «adaldyq alańy» jobalyq keńsesi ashyldy
KÓKShETAÝ. QazAqparat - Kókshetaýda «Aqmola - adaldyq alańy» jobalyq keńsesi ashyldy, dep habarlaıdy QazAqparat tilshisi.
Sharaǵa Aqmola oblysynyń ákimi Málik Myrzalınniń jáne QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov qatysty.
Jobanyń maqsaty turmystyq jemqorlyqty azaıtý, azamattardyń memlekettik bılik ınstıtýttaryna senimin arttyrý.
Joba bógetsiz ortany qalyptastyrýǵa, basshylardyń jeke jaýapkershiligin kúsheıtýge, halyqqa jaıly jaǵdaılar jasaýǵa jáne qoǵamdyq baqylaýdy arttyrýǵa baǵyttalǵan. Ony keshendi túrde júzege asyrýǵa kásipkerler, azamattyq qoǵam ınstıtýttary, BAQ ókilderi tartylatyn bolady.
Shara sheńberinde QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Shoqan Ýálıhanov atyndaǵy Kókshetaý memlekettik ýnıversıtetiniń stýdentterimen kezdesip, «Sanaly urpaq» klýbynyń front-keńsesiniń jumysymen tanysty.
«Búgingi kúni biz úshin joǵary áleýmettik tıimdilik pen memlekettik bılik organdary jumysynyń minsizdigine kepil bola alatyn kásibı dárejede daıyndalǵan jáne adamgershilik jaǵynan tárbıe alǵan memlekettik qyzmetshilerdi qalyptastyrýdan artyq mańyzdy mindet joq» - dep atap ótti Oljas Bektenov stýdenttermen bolǵan kezdesýinde.
Sonymen qatar, Oljas Bektenovtyń qatysýymen ýnıversıtet bazasynda saltanatty túrde alǵashqy «Integrity Shop» - adaldyq dúkeniniń ashylý rásimi ótti. Atalmysh joba jastardyń boıynda adaldyq, tárbıelik sııaqty asyl qasıetterdi tárbıeleýge, qoǵamda senim atmosferasyn qalyptastyrýǵa baǵyttalǵan.
