Kókshetaýda «Abylaı han» kitabynyń tusaýkeseri ótti

KÓKShETAÝ. QazAqparat – Kókshetaýda elimizge tanymal tarıhshy, L.Gýmılev atyndaǵy Eýrazııa ulttyq ýnıversıtetiniń professory Jambyl Artyqbaevtyń «Abylaı han» kitabynyń tusaýkeseri bolyp ótti, dep habarlaıdy QazAqparat tilshisi.

Maǵjan Jumabaev atyndaǵy Aqmola oblystyq ámbabap-ǵylymı kitaphanasynda ótken sharaǵa jergilikti zııaly qaýym ókilderi, joǵary jáne orta arnaýly oqý oryndarynyń stýdentteri men oqýshylary qatysty.

Avtordyń aıtýynsha, atalmysh kitapty shyǵarý ıdeıasy Abylaı hannyń 300 jyldyǵyn atap ótý kezinde paıda bolǵan. Kitaptyń tusaýkeseri de Kókshetaýda ótip jatqany tekten tek emes, Abylaı han ordasyn tikken óńir.

«Mundaı tarıhı dúnıeni jazý ońaı sharýa emes. Jeti jyl boıy eńbektendim. Abylaı hanǵa qatysty tarıhty jan-jaqty zerttedim», deıdi professor.

Sonymen qatar, sharada qoǵam qaıratkeri Murat qajy Ydyrysov, Aqmola oblystyq ardagerler keńesiniń tóraǵasy Ǵosman Tóleǵul, tarıh ǵylymdarynyń doktory, ǵalym Qadyrjan Ábýev sııaqty birqatar zııaly qaýym ókilderi týyndy týraly ózderiniń jyly lebizderin bildirdi.