Kókshetaýda 91 jastaǵy keıýananyń 850 myń teńgesin jymqyrǵan kúdiktiler ustaldy
KÓKShETAÝ. QazAqparat - Kókshetaýda 91 jastaǵy keıýananyń 850 myń teńge aqshasyn alaıaqtyq jolmen jymqyrǵan kúdiktiler ustaldy, dep habarlaıdy QazAqparat tilshisi Aqmola oblysynyń PD baspasóz qyzmetine silteme jasap.
Vedomstvonyń deregi boıynsha, qańtardyń 21-i kúni Kókshetaý qalasynyń polıtsııa basqarmasyna 91 jastaǵy zeınetker aryzdanǵan. Zardap shegýshi keıýananyń sózinshe, belgisiz eki kelinshek 850 myń teńge aqshasyn aldap alyp ketken. Keıin belgili bolǵandaı qaskóıler ózderin áleýmettik qyzmet jumysshysy retinde tanystyryp, 50 myń teńge kóleminde syıaqy beremiz dep ýáde etken. Úıge kirgen kúdiktiler zeınetkerge kóz tıgenin aıtyp, ony aqsha arqyly emdeýge bolatynyna sendirgen. Sengish zeınetker jınaǵan bar aqshasyn alaıaqtardyń qolyna ustata salǵan. Artynsha aldanǵanyn túsingen ol polıtsııaǵa habarlasyp, kómek suraıdy.
«Jedel izdestirý sharasyn qolǵa alǵan polıtsııa qyzmetkerleri birer saǵattyń ishinde kúdiktilerdi Kókshetaý qalasynan qashyp bara jatqan jerinde ustady. Tintý barysynda kúdiktilerden zeınetkerdiń urlanǵan zattary tárkilendi. Qazirgi kezde QR QK 191-babynyń 2-bóligi boıynsha qylmystyq is qozǵalyp, sotqa deıingi tergeý amaldary júrgizilip jatyr. Kúdiktilerdiń osyndaı ózge qylmysqa qatysy bar-joǵy anyqtalý ústinde», - dedi PD baspasóz qyzmetindegiler.
