Kókshetaýda 9 qabatty turǵyn úıde órt shyǵyp, 25 adam evakýatsııalandy
KÓKShETAÝ. QazAqparat – Kókshetaýda 9 qabatty turǵyn úıde órt shyǵyp, 25 adam evakýatsııalandy, onyń 10-bala, dep habarlaıdy QazAqparat tilshisi Aqmola oblystyq TJD baspasóz qyzmetine silteme jasap.
Vedomstvonyń málimetinshe, órt búgin sáýirdiń 25-de saǵat 17:45 shamasynda Osıpenko 1/3 mekenjaıy boıynsha ornalasqan 9 qabatty turǵyn úıdiń 7-shi qabatyndaǵy páterdiń balkonynda tutanǵan. Tórt sharshy metr aýmaqty sharpyǵan órtten úı zattary jandy.
«Tilsiz jaýdy aýyzdyqtaýǵa TJD jeke quramynan 26 qyzmetker jáne 10 arnaıy órt sóndirý tehnıkasy jumyldyryldy. Órttiń saldarynan arnaıy qutqarý baspaldaǵynyń kómegimen 25 adam evakýatsııalandy, onyń 10-bala. Zardap shekkender men mert bolǵandar joq», - dedi vedomstvonyń baspasóz qyzmetindegiler.
