Kókshetaýda 85 otbasyna páter kiltteri tapsyryldy
Abylaı han alańynda ótken qýanysh ıelerine jańa páterdiń kiltin tapsyrý rásimine aımaq basshysy Ermek Marjyqpaev qatysyp, jınalǵan qaýymdy alda kele jatqan Jańa jyl merekesimen quttyqtady. Oblys ákimi ótip bara jatqan jyl aımaq úshin tabysty aıaqtalǵanyn atap ótti.
«Dástúr boıynsha, jyl toǵysynda biz tarıh betterinde qalatyn ótken jyldy qorytyndylap, aldaǵy kezeńge perspektıvalyq josparlar belgileımiz. Ótip bara jatqan jyldyń qorytyndysy boıynsha oblystyń áleýmettik-ekonomıkalyq damý kórsetkishteri birshama jaqsardy, – dep atap ótti Ermek Marjyqpaev. – Elbasy Nursultan Nazarbaev halyqtyń baspana máselesin sheshý qajettigine udaıy nazar aýdaryp keledi. Osy baǵytta qolǵa alynǵan memlekettik baǵdarlamalar oblys aýmaǵynda baıyptylyqpen júzege asyrylyp, kóptegen turǵyndar páterli bolyp, qýanyshqa kenelýde. Oǵan «Nurly jol», «Qoljetimdi baspana – 2020», «Óńirlerdi damytý-2020» tárizdi baǵdarlamalar aıasynda búgingi jańa páterlerdiń baspanaǵa muqtaj jandarǵa berilýi aıqyn dálel. Sońǵy úsh jyldyń ishinde oblys boıynsha barlyǵy 131 turǵyn úı nemese 131 myń sharshy metr turǵyn úı paıdalanýǵa berildi. Bıylǵy jyldyń basynan beri Kókshetaý qalasynda ǵana 350 páter ıesin tapty. Búgin mine, buǵan qosa taǵy 85 páterdi berip otyrmyz. Kelesi jyldaǵy aıtýly oqıǵalardyń biri – Kókshetaýda ótetin Qazaqstan men Reseıdiń aımaqaralyq yntymaqtastyq forýmy bolmaq. Bul shara oblysymyzdyń keleshekte odan ári kemeldenip, damı túsýine jol ashady».
Saltanatty sharada aımaq basshysy Saryarqa shaǵyn aýdanynda salynǵan jańa eki turǵyn úıdegi 85 páterdiń kilti men jańajyldyq syılyqtardy turǵyn úı salymshylaryna tapsyrdy.
Sonymen qatar, sharada birqatar aýdandyq jáne qalalyq polıtsııa bólimderine sý jańa bes «ÝAZ» kóligi, Býrabaı aýdanyndaǵy «Býrabaı meırim» qoǵamdyq birlestigine múmkindigi shekteýli jandarǵa arnalǵan «Invataksı» kóligi tapsyryldy.
