Kókshetaýda 8 adamnyń tóbelesi vıdeoǵa túsip qaldy
Vedomstvonyń málimetinshe, 2 tamyzda Kókshetaý qalalyq PB JBO beınebaqylaý kezekshi ınspektory monıtorıng kezinde Abaı jáne Táshenov kósheleriniń qılysynda 8 er adamnyń tóbelesip jatqanyn kórgen. Oqıǵa ornyna dereý patrýldik polıtsııa batalonyń qyzmetkerleri men jedel-tergeý toby jiberildi.
Tártip saqshylary anyqtaǵandaı, jergilikti bes adam jazǵy dámhanalardyń birinde áýe-desanty áskerleriniń kúnin atap ótken. Otyrys kezinde ózge úsh adammen sózge kelisip qalǵan top syrtqa shyǵyp, máseleni sheshpek bolǵan.
«Tártip saqshylary er adamdardyń buzaqylyq áreketiniń jolyn kesti, tóbeleske qatysýshylardyń barlyǵy Kókshetaý qalalyq PB jetkizildi. Osy jaǵdaıǵa baılanysty QR QK 293 babynyń 2 bóligi «buzaqylyq» boıynsha sotqa deıingi tergeý amaldary júrgizilýde», - deıdi vedomstvodan.
Aıta keteıik, PD baspasóz qyzmetinen atap ótkendeı, jyl basynan beri Aqmola oblysynda beınebaqylaý kamerasy arqyly 150 astam qylmystyń beti ashyldy.