Kókshetaýda 7 jastaǵy balanyń ústine beltemir qulap ketti
KÓKShETAÝ. QazAqparat – Kókshetaýdyń ortalyq saıabaǵyndaǵy sport alańynda 7 jasar balanyń ústine trenajer beltemiri qulap ketti, dep habarlaıdy QazAqparat tilshisi.
«Búgin men ortalyq saıabaqta boldym. Sport alańynda inimniń ústine trenajer beltemiri qulady. Abyroı bolǵanda qatty jaraqat alǵan joq. Aryz jazdym. Saıabaq ákimshisine qatysty shara qoldanylady dep senemin. Bul trenajerde onyń isten shyqqany týraly eshqandaı eskertý belgileri bolǵan joq. Tipti, jerge baılanǵan nemese jerge de túsirilmegen», - dep pikir bildirdi beınejazbaǵa tirkelýshi.
Aqmola oblystyq densaýlyq saqtaý basqarmasy baspasóz qyzmetiniń málimeti boıynsha, 7 jasar balany jedel járdem kómek brıgadasy aýrýhanaǵa jetkizip, ondaǵylar balaǵa alǵashqy medıtsınalyq kómek kórsetken soń ambýlatorııalyq em qoldaný úshin úıine jiberdi. Bala tek qaraqus tusyn aýyrtyp alǵan.
«Balany travmatolog qarady. Oǵan tynyshtyq jáne turǵylyqty jeri boıynsha emhanaǵa qaralý týraly usynys jasaldy», - dep tolyqtyrdy Densaýlyq saqtaý basqarmasynyń baspasóz qyzmetindegiler.
Al, Aqmola oblystyq PD baspasóz qyzmetiniń málimetinshe, atalǵan oqıǵa tekserý jáne saraptama úshin QR QK 156 baby (Eńbekti qorǵaý erejesiniń buzylýy) boıynsha sotqa deıingi tergeýdiń biryńǵaı tiziliminde tirkelgen.
