Kókshetaýda 7 qabattan sekirgen jigitti polıtsııa aıaǵynan ustap qaldy
KÓKShETAÝ. QazAqparat - Kókshetaýda polıtseıler sýıtsıdtiń aldyn aldy. Bul týraly oblystyq ІІD baspasóz qyzmetinen habarlady.
Polıtseılerdiń málimeti boıynsha keleńsiz jaǵdaı shilde aıynyń basynda oryn alǵan. Bul týraly Kókshetaý qalasynyń turǵyny, azamatsha arnaıy «102» telefon nómirine habarlaǵan. Áıeldiń sózine qaraǵanda mas kúıeý balasy úıinde daý shyǵaryp, qyzy men nemeresin uryp jatqanyn aıtqan.
Oqıǵa ornyna Kókshetaý qalalyq ІІB jergilikti polıtsııa qyzmeti jol patrýldik qyzmetiniń qyzmetkerleri polıtsııa serjanty Nurjan Bákirov pen polıtsııa leıtenanty ýchaskelik ınspektor Álıhan Qojanov jedel jetedi.
Nurjan Bákirov mas er adamnyń qolynan balany tartyp alyp, anasyna beredi. Sol kezde er adam balkonnyń esigin jaýyp alyp, 7 qabattan sekirmek bolady. Balkonnyń terezesin syndyryp kirgen polıtseıler tómen qulap bara jatqan 32 jastaǵy er adamnyń aıaǵynan ustap úlgeredi.
Keıin polıtsııa bólimshesine jetkizilgen er adam esin jıyp, jasaǵan áreketine ókinish bildirgen. Qazir oǵan ishimdik qumarlyqtan kúshtep emdeý sharasy qoldanylmaq.
