Kókshetaýda 67 myń sharshy metrden astam turǵyn úı qurylystary júrgizilýde
KÓKShETAÝ. QazAqparat - Kókshetaý qalasynda «Nurly jer» baǵdarlamasy aıasynda jalpy aýdany 67 myń sharshy metrden asatyn jáne jalpy quny 8,9 mlrd teńge bolatyn 21 turǵyn úıdiń qurylysy júrgizilýde. Bul týraly brıfıngide Kókshetaý qalasynyń ákimi Baýyrjan Ǵaısa málim etti, dep habarlaıdy QazAqparat tilshisi.
Qala ákiminiń aıtýynsha, turǵyn úı berý - eń kóp talqylanatyn jáne kópshilikti tolǵandyratyn túıtkilderdiń biri. Máselen, «Nurly jer» baǵdarlamasy aıasynda Kókshetaý qalasynyń qurylys bólimimen jalpy aýdany 67 myń sharshy metrden asatyn jáne jalpy quny 8,9 mlrd teńge bolatyn 21 turǵyn úı nysanynyń qurylysy júrgizilýde.
Jyl sońyna deıin Kókshetaý qalasynda jalpy aýdany 30 myń sharshy metrden asatyn 16 turǵyn úı nysanyn paıdalanýǵa berý josparlanyp otyr.
«Alaıda, elimizde qurylys materıaldary baǵasynyń ósýine alańdaýshylyq bar. Bul óz kezeginde qurylys salasyna jáne nysandardy tapsyrý merzimderine keri áser etti. Taǵy bir másele kóppáterli turǵyn úılerdi kútip ustaý bolyp tabylady», - dep atap ótti qala basshysy.
Al 1996 jyly PIK qurylǵannan beri 25 jyl ishinde kóptegen kemshilikter oryn aldy. Bul jalpy júıeniń bedelin túsirdi, sondaı-aq azamattardyń qyzmet kórsetý sapasyna degen narazylyǵyn týdyrdy. Kóp páterli úılerdiń turǵyndary qazir basqarý nysanyn tańdaýǵa jáne ózgertýge, sondaı-aq menshik ıeleriniń birlestigin nemese jaı seriktestikti qurýǵa quqyly. Árbir kóppáterli turǵyn úıdiń óziniń basqarý organy-úı keńesi, páter ıeleriniń, turǵyn emes úı-jaılardyń arasynan úıdiń múddelerin bildiretin jáne qorǵaıtyn baqylaý organy bolady. Al barlyq PIK-ter 2022 jyldyń shildesine deıin úıge ortaq múlikti berip, servıstik nemese basqarýshy kompanııa túrinde damýdyń ózindik jolyn tańdaýy qajet.
«Halyq únine qulaq asatyn memleket» tujyrymdamasyn iske asyrý maqsatynda azamattarymyzdyń qajettilikterin sapaly oryndaý, memlekettik organdardyń jedel jáne tıimdi áreket etýi úshin ákimdiktiń halyqpen keri baılanysynyń pármendi tásilderiniń biri áleýmettik jeliler bolyp tabylady, onda árbir azamat ózin qyzyqtyratyn suraq qoıa alady. Ákimdik qyzmetkerleri kún saıyn turǵyn úı-kommýnaldyq sharýashylyǵynyń problemalyq máselelerin anyqtaý úshin áleýmettik jelilerge monıtorıng júrgizedi. Monıtorıng barysynda anyqtalǵan máseleler jedel áreket etý sharalaryn qabyldaý úshin tıisti memlekettik organdarǵa jiberiledi», - dep túıindedi Baýyrjan Ǵaısa.
