Kókshetaýda 630 oryndyq zamanaýı aýrýhana salyndy
KÓKShETAÝ. QazAqparat – Aqmola oblysynyń ortalyǵynda 630 oryndyq zamanaýı aýrýhana salyndy. Ol úshin «2020-2025 jyldary densaýlyq saqtaýdy damytý» baǵdarlamasy sheńberinde «Saryarqa» shaǵynaýdany aýmaǵynan 17 gektar jer telimi bólindi, dep habarlaıdy QazAqparat tilshisi ákimdiktiń baspasóz qyzmetine silteme jasap.
Jobany júzege asyrý memlekettik-jekeshelik áriptestik sheńberinde, keıin respýblıkalyq bıýdjet esebinen qarjylandyrý arqyly júzege asyrylady. Qurylys jumystaryn otandyq «Astana Group» holdıngi túrkııalyq «Ronesans Holding» kompanııasymen birlesip júrgizedi.
Osy rette, aımaq basshysy Ermek Marjyqpaev ınvestorlarmen ekijaqty kezdesý ótkizip, memorandýmǵa qol qoıdy. Ol osy jobaǵa bastamashylyq tanytyp otyrǵan «Astana Group» basshylyǵyna alǵys bildirip, jańa aýrýhananyń oblys úshin mańyzy zor ekenin atap ótti.
«Pandemııa halyq densaýlyǵyn birinshi kezekke shyǵardy. Biz múmkindiginshe, densaýlyq saqtaý salasynda jańa aýrýhanalar salyp, eskisin jóndep jatyrmyz. Materıaldyq-tehnıkalyq baza da jańartylýda. Biz úshin sizderdiki sııaqty joǵary deńgeıdegi kompanııamen jumys isteý mańyzdy», - dep atap ótti Ermek Marjyqpaev.
Joba óńir turǵyndary úshin medıtsınalyq qyzmet sapasyn arttyrýǵa, medıtsınalyq týrızmdi damytýǵa septigin tıgizbekshi. Jobany keler jyldyń maýsym aıynda bastap, 2023 jyly aıaqtaý josparlanyp otyr.
