Kókshetaýda 600-ge jýyq medıtsına qyzmetkeri jalaqylarynyń keshikkenine shaǵymdandy
KÓKShETAÝ. KAZINFORM – Kókshetaýdaǵy oblystyq balalar aýrýhanasynyń 600-ge jýyq qyzmetkeri jalaqynyń keshiktirilýine baılanysty shaǵym aıtty.
Medıtsına qyzmetkerleriniń sózinshe, másele Áleýmettik medıtsınalyq saqtandyrý qorynyń qarjy aýdarýdy keshiktirýine baılanysty týyndaǵan.
Áleýmettik jelide taraǵan aqparatqa baılanysty túsinikteme bergen Kópbeıindi oblystyq balalar aýrýhanasy ókilderi qor kelisimshart somasynyń tek 21 paıyzyn ǵana tólegenin málimdedi.
– Túsken qarjy kólemi tek úsh aılyq jalaqyny tóleýge jetti. Sonymen qatar bul qarajattan salyq tólemderi, kommýnaldyq qyzmetter, dári-dármek satyp alý jáne balalardyń tamaqtanýyna qatysty mindetti shyǵyndar da óteledi, – dep habarlady aýrýhana.
Mekeme málimetinshe, qosymsha avans bólý týraly birneshe ret resmı hat joldanǵan. Alaıda qańtar aıynan bergi kórsetilgen medıtsınalyq qyzmetterdiń esep-reestrleri jabylmaǵandyqtan, qosymsha qarjylandyrý da, resmı jaýap ta kelip túspegen.
Aýrýhana 8 mamyr kúni tarıfterdi kóterý týraly qosymsha kelisimge qol qoıylyp, qańtar aıynyń esep-reestri jabylǵanyn habarlady. Biraq jarııalanǵan sátte qarjy mekeme shotyna túspegen.
– Aýrýhana ákimshiligi qarjylyq turaqtylyqty qamtamasyz etý jáne qyzmetkerlerdiń jalaqysyn ýaqytyly tóleý úshin barlyq qajetti sharany qabyldap jatyr, – delingen habarlamada.
Óz kezeginde Áleýmettik medıtsınalyq saqtandyrý qorynyń Aqmola oblystyq fılıaly qarjylandyrýdyń keshigýi zańnamadaǵy ózgeristerge baılanysty ekenin túsindirdi.
Atap aıtqanda, 2026 jylǵy 1 qańtardan bastap birqatar aýrý túrleri tegin medıtsınalyq kómektiń kepildik berilgen kóleminen mindetti áleýmettik medıtsınalyq saqtandyrý paketine aýystyrylyp, olarǵa tarıfter kóterilgen. Bul ózgeristerdi Densaýlyq saqtaý mınıstrliginiń aqparattyq júıelerine engizý úshin ýaqyt qajet bolǵan.
Qor málimetinshe, birinshi toqsanda medıtsınalyq uıymdarǵa kelisimshart somasynyń 30 paıyzyna deıin avans qarastyrylǵan.
– Oblystyq balalar aýrýhanasyna 636,3 mln teńge kóleminde avans berildi. Bul 2026 jylǵa arnalǵan kelisimshart somasynyń 21 paıyzyn quraıdy. Sonymen qatar esepti kezeń úshin 100 paıyzdyq tólem júrgizildi, – dep málimdedi fılıal.
Áleýmettik medıtsınalyq saqtandyrý qory qosymsha kelisim boıynsha qarajat 8 mamyr kúni aýdarylǵanyn jáne aldaǵy úsh kún ishinde aýrýhana shotyna túsýi tıis ekenin habarlady.
Aıta keteıik, Kókshetaýdaǵy áskerı kolledjdiń 300-den astam kadeti áli karantınde jatyr.
