Kókshetaýda 52 jastaǵy er adam sýıtsıd jasamaq boldy
KÓKShETAÝ. QazAqparat - Kókshetaýda 52 jastaǵy er adam sýıtsıd jasamaq boldy. Polıtsııa qyzmetkerleri ony qutqaryp qaldy, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.
«Keleńsiz jaǵdaı aqpannyń 28-de keshki saǵat 19:30-da tirkeldi. Bul týraly jedel «102» telefon nómirine aqparat tústi. Onda Súleımenov kóshesiniń boıynda ornalasqan JShS biriniń aýmaǵynda belgisiz er adamnyń metall konstrýkııanyń tóbesine shyǵyp, 10-15 metr bıiktikten sekirýge oqtalyp jatqandyǵyn aıtqan», - deıdi vedomstvodan.
PD baspasóz qyzmetiniń málimetinshe, bul aqparat Kókshetaý qalalyq PB barlyq patrýldik polıtsııa batalonyna jetkizildi. Sol mańda júrgen polıtsııa leıtenanty Aslan Esmaǵzamov pen polıtsııa serjanty Ádil Aıýpovtyń «Ásker - 5» ekıpajy dereý er adamdy qutqarýǵa bardy. Munaranyń tóbesinde turǵan ony sabyrǵa shaqyryp, raıynan qaıtarý úshin Aslan Esmaǵzamov te kóterildi. Tipti, tártip saqshysy er adamnyń týǵan baýyryna telefon arqyly shyqty. Osylaısha, polıtsııa qyzmetkeri men baýyry birlesip, er adamdy kóndirdi, ol jerge tústi.
«Er adam ishimdik ishpegen. Onyń mundaı qadamǵa barýyna otbasylyq másele ıtermelegen. Qazirgi kezde 52 jastaǵy er adamnyń ómirine qaýip tónip turǵan joq, ol otbasymen birge», - dep tolyqtyrdy vedomstvodan.
Aıta keteıik, aǵymdaǵy jylǵy aqpannyń 10-da Kókshetaý qalasyndaǵy temirjol vokzalynyń kópirinen taǵy bir er adam sekirmek bolǵan edi. Ony polıtsııa serjanty Baqdaýlet Kóshkinbaı qutqaryp qaldy.
