Kókshetaýda 5 jasar bala úıinen ketip qalǵan
KÓKShETAÝ. QazAqparat – Kókshetaýda avtobýsqa otyryp, úıinen ketip qalǵan 5 jasar balanyń ata-anasy tabyldy, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.
Vedomstvonyń málimetinshe, Kókshetaý qalalyq PB kezekshilik bólimine qalaishilik baǵyttaǵy №2 avtobýstyń kondýktory habarlasqan. Onyń sózinshe, jasy 4-5 shamasyndaǵy ul bala Zastantsıonnyı (Shanhaı) kentinde avtobýsqa otyrǵan.
«Atalmysh baǵyt boıynsha Kókshetaý qalalyq PB jergilikti polıtsııa qyzmeti bóliminiń qyzmetkeri, polıtsııa leıtenanty Roza Sháımerdenova baryp, balanyń ata-anasyn izdestirdi. Belgili bolǵandaı, balanyń esimi Aldııar, al anasy Saltanat. Ákesiniń aıtýynsha, ol ózi jumysta bolǵan, anasy úıde bolǵan, bala syrtta oınap júrgen. Bala tátesine barmaq bolyp, birinshi kezdesken avtobýsqa otyryp kete barǵan» deıdi vedomstvodan.
Osy rette, tártip saqshylary ata-analarǵa balalardy baqylaýsyz qaldyrmaýdy suraıdy. Jyl basynan beri oblysta jas balalardyń joǵalýy boıynsha 2 oqıǵa tirkelgen.
