Kókshetaýda 5-6 jyl buryn oryn alǵan aty shýly eki qylmystyń beti ashyldy

Polıtseılerdiń málimeti boıynsha qoǵamnyń narazylyǵyn týdyrǵan eki qylmysty oblystyq ІІD-niń Uıymdasqan qylmyspen kúres basqarmasynyń qyzmetkerleri ashyp otyr. Onyń biri 2010 jyldyń tamyzynda Kókshetaý qalasyndaǵy lımonad tsehynyń eki kúzetshisin óltirý bolsa, ekinshisi  2009 jyldyń qyrkúıek aıynda oryn alǵan «Sunqar» ańshylyq dúkeninen birneshe qarý urlaý qylmysy bolyp otyr.

Eske sala ketsek,  2009 jyldyń 17 qyrkúıeginde Kókshetaý qalasyndaǵy «Sunqar» ańshylyq dúkeniniń aýmaǵyna belgisiz birneshe adam kirip, tereze arqyly karabın, vıntovka, pnevmatıkalyq pıstolet, oq-dári tárizdi birneshe qarý túrler qoldy qylǵan bolatyn. Sol kezde, atalǵan qylmysqa baılanysty QR QK-niń 255-babynyń 3-bólimi boıynsha qylmystyq is qozǵalǵan bolatyn.

Keıin araǵa týra bir jyl salyp 2010 jyldyń 2010 jyldyń tamyzynda Kókshetaý qalasyndaǵy lımonad tsehynyń eki kúzetshisi óltirilgen bolatyn.  Onda kúdiktiler «avtoqalashyq» shaǵyn aýdanynda ornalasqan lımonad tsehynyń aýmaǵyna kirip, eki kúzetshini atyp óltirip,  600 000 teńge aqshany qoldy qylady.

Saraptama  barysynda kúzetshilerdiń «Sunqar» ańshylyq dúkeninen urlanǵan qarýdan atyp óltirilgeni anyqtalady. Atalǵan oqıǵaǵa baılanysty QR QK-niń 96-babynyń 2-bólimi boıynsha (adam óltirý) qylmystyq is qozǵalady.

Polıtseılerdiń málimeti boıynsha qoǵamnyń narazylyǵyn týdyrǵan eki qylmystyń beti  5-6 jyl ótken soń ǵana ashylyp otyr.

Bıyl mamyr aıynda oblystyq ІІD Uıymdasqan qylmyspen kúres basqarmasynyń qyzmetkerleri belgisiz qarýdan jasyryn oq atqan kúdiktilerdi qolǵa túsiredi. Kúdiktilerdi ustaý barysynda olar tártip saqshylaryna qarsylyq kórsetti. Osyǵan baılanysty olardyń ústinen QR QK-niń 380-babynyń 2-bólimi boıynsha qylmystyq is qozǵaldy.

Keıin tekseris barysynda kúdiktilerdiń 2009 jáne 2010 jyldary oryn alǵan qylmysqa qatysy bar ekeni dáleldenedi.

Qazirgi kezde 31 jáne 32 jastaǵy úsh kúdikti ustalyp, kinásin moıyndap otyr.