Kókshetaýda 49 jastaǵy əıeldi baýyzdap óltirgen kúdikti ustaldy
KÓKShETAÝ. QazAqparat-Kókshetaýda 49 jastaǵy kelinshekti asa qatygezdikpen óltirgen kúdikti qolǵa tústi. Bul týraly Kókshetaý qalasynyń ІІB basshysy Qanat Nurmaǵambetov BAQ ókilderimen ótkizgen brıfıngte məlimdedi, dep habarlaıdy «QazAqparat» HAA tilshisi.
Qanat Nurmaǵambetovtyń aıtýynsha, aǵymdaǵy jyldyń 6 maýsymynda qalalyq ІІB kezekshilik bólimine telefon arqyly 1978 jylǵy er adam habarlasyp, əıeliniń belgisiz bireýdiń qolynan qaza bolǵanyn habarlaǵan.
Oqıǵa ornyna dereý jetken polıtsııa qyzmetkerleri əıeldi basynan urǵan soqqy men tamaq tusynda eki jerden pyshaq izderin anyqtaǵan. Sonymen qatar, úıde altyn buıymdardyń joǵalǵany da belgili boldy.
Keıin anyqtalǵandaı əıel oblys ortalyǵynda aǵylshyn tilinen repıtıtor bolyp jumys istegen jəne budan eki kún buryn óltirilgen. Sol kezde kúıeýi issaparda bolǵan.
Sot-medıtsınalyq saraptama qorytyndysy boıynsha kelinshektiń baýyzdap óltirilgenin anyqtaldy.
Alaıda, kóp uzamaı polıtseıler kúdikti 1983 jylǵy jergilikti turǵyndy qolǵa túsirdi. Kúdikti osy otbasynyń tanysy bolyp shyqty.
«Ol urlanǵan zattardy lombardqa ótkizip jibergen», dep túsindirdi Qanat Nurmaǵambetov.
Qazirgi kezde QR QK 99 baby (adam óltirý) boıynsha qylmystyq is qozǵalyp, tergeý amaldary jalǵasýda.
