Kókshetaýda 40-tan astam úı jylýsyz qaldy
Kókshetaýdaǵy «Kapıtal» turǵyn úı kesheniniń mańynda dıametri 700 mm bolatyn jylý qubyry jarylyp, 40-tan astam úı jylýsyz qaldy, dep habarlaıdy Kazinform tilshisi.
10 jeltoqsan kúni saǵat 19.00 shamasynda Kókshetaýda Sábataev pen Saǵdıev kósheleriniń qıylysyndaǵy jylý trassasynda apat boldy. Osy ýaqytta Sábataev kóshesi, № 82 turǵyn úı aýmaǵyndaǵy 700 mm dıametrli №1 jylý trassasyndaǵy aqaý anyqtaldy.
- Saǵat 19.00-den bastap tótenshe jaǵdaıdy joıý jumystary bastaldy, aqaýdyń orny tabyldy. 40-qa jýyq nysandy jylýmen qamtamasyz etý shektelgen, olar kópqabatty úıler men jeke turǵyn úıler, - dedi Kókshetaý qalasy ákiminiń orynbasary Dáýlet Júnisov.
Atap aıtqanda, 13 kóppáterli turǵyn úı, 24 jeke turǵyn úı jáne bes ǵımarat jylýsyz qaldy.
Apatty joıýǵa «Kókshetaý jylý» MKK qutqarýshylary men qyzmetkerleri jumyldyryldy.
Ákim orynbasarynyń aıtýynsha, jóndeý jumystary aıaqtalǵannan keıin ýchaskeniń gıdravlıkalyq jáne temperatýralyq jaǵdaıy qalpyna keltiriledi.
Esterińizge sala keteıik, 7 jeltoqsanda Stepnogorsk qalasyndaǵy Slavskogo jáne Tselınogradskaıa kósheleriniń qıylysynda da jylý trassasynda apat bolyp, 62-ge jýyq turǵyn úı jylýsyz qalǵan bolatyn.
