Kókshetaýda 36 jol qıylysyndaǵy baǵdarshamdar sóndirildi
ASTANA. KAZINFORM — Qaladaǵy 36 jol qıylysyndaǵy baǵdarshamdar tehnıkalyq jumystarǵa baılanysty ýaqytsha sóndirilgendikten, tártip saqshylarynyń qosymsha baqylaýy qajet boldy, dep habarlaıdy Polisia.kz.
Saǵat 10:00–den 14:00–arasynda mamandar aqaýdy joıyp jatqan ýaqytta polıtseıler kólik pen jaıaý júrginshiler qozǵalysyn qolmen rettep, keptelis pen yqtımal jol-kólik oqıǵalarynyń aldyn aldy. Jumys kúnderi, ásirese joldaǵy kólik pen jaıaý júrginshiler legi kóbeıetin tańerteńgi jáne keshki ýaqytta, jol apatynyń qaýpi joǵarylaıdy. Osyny eskere otyryp, qaladaǵy eń qarbalas qıylystarda patrýldik polıtsııa ınspektorlary retteýshi qyzmetin atqardy.
Sonymen qatar qalalyq polıtsııa basqarmasy áleýmettik jelilerge monıtorıng júrgizip otyrady. Eger qozǵalys qıyndyǵy týraly habarlamalar nemese azamattardan shaǵymdar tússe, polıtseıler turǵan belgilengen ýchaskege birden patrýldik polıtsııa ekıpajy jiberiledi.
PPB qyzmetiniń ınspektory Jandos Eskendirov úshin bul kún erekshe boldy — ol qyzmettik tájirıbesinde alǵash ret jol qozǵalysyn retteý mindetin oryndady. Onyń tálimgeri — Almas Maıjan jas áriptesine tapsyrmany senimdi oryndaýǵa jáne joldaǵy tártipti saqtaýǵa kómektesti.
— Jol qozǵalysyn retteý — bul jaı ǵana taıaqshany bulǵaý emes. Bul — myńdaǵan adamnyń qaýipsizdigi úshin jaýapkershilik. Eń bastysy — nazardy joǵaltpaý, senimdi ári sabyrly bolý, — dedi Almas Maıjan.
Kókshetaý patrýldik polıtsııa qyzmetkerleri jol qozǵalysynyń qaýipsizdigi men qala turǵyndarynyń jaıly júrýin qamtamasyz etý baǵytyndaǵy qyzmetin jalǵastyryp keledi.
Osydan buryn Kókshetaýdaǵy birneshe aýdanda jaryq ýaqytsha sóndiriletini habarlanǵan edi.