Kókshetaýda 33 jastaǵy áıel jigitine qyzǵanyshtan pyshaq saldy
KÓKShETAÝ. Qazaqparat - Kókshetaý turǵynyna pyshaq suqqan 33 jastaǵy áıel ustaldy, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
Vedomstvonyń málimetinshe, 16 qyrkúıekte Kókshetaý qalalyq polıtsııasynyń kezekshi bólimine qalalyq aýrýhananyń medbıkesi habarlasyp, 36 jastaǵy jergilikti turǵynnyń «ish tusynan tilik jaraqaty» dıagnozymen túskenin aıtqan.
«Osyǵan baılanysty tártip saqshylary Qylmystyq kodekstiń 106-baby 1-bóligi boıynsha («Densaýlyǵyna qasaqana aýyr zııan keltirý») sotqa deıingi tergeý amaldaryn bastady», - deıdi vedomstvodan.
Jedel-izdestirý nátıjesinde tártip saqshylary zardap shekken er adamǵa 33 jastaǵy óziniń tanys áıeli pyshaq salǵanyn anyqtady. Olardyń kezdesip júrgenine on aıǵa jýyqtaǵany da belgili boldy.
Anyqtalǵanyndaı, araq iship otyrǵan olardyń arasynda janjal shyǵyp, qyzǵanyshtan áıel er adamǵa pyshaq suǵyp alǵan.
«Kúdikti ustalyp, qylmysyn moıyndady. Qazirgi kezde onyń ústinen sotqa deıingi tergeý amaldary júrgizilýde» dep tolyqtyrdy vedomstvodan.
