Kókshetaýda 300-den astam ákim bas qosty
KÓKShETAÝ. QazAqparat - Kókshetaýda «Barlyq deńgeıdegi ákimderdiń óńirdi damytýdaǵy róli» atty forým ótti. Oǵan aımaq basshysy Málik Myrzalın, oblystyń barlyq qalalary men aýdandarynan 300-den astam jergilikti ákimder qatysty, dep habarlaıdy QazAqparat tilshisi.
«Búgingi tańda ákimderge zor jaýapkershilik júktelip otyr. Buryn aýyldyq okrýgterdiń ákimderi taǵaıyndalyp kelgen bolsa, búginde olardy turǵyndar ózderi saılap alady. Ákimdik qyzmettiń dárejesiniń bıik ekenin, onda halyqtyń úkilegen úmiti, senimi jatqanyn osydan-aq kórýge bolady. Sondyqtan da, biz úshin qarapaıym halyqtyń múddesi qashanda birinshi kezekte turýy tıis», - dep atap ótti ákimder forýmynda sóz sóılegen aımaq basshysy Málik Myrzalın.
Forým jumysy odan ári sektsııalarda jalǵasty. Oblys ákimi orynbasarlarynyń, oblys ákimi apparaty basshysynyń qatysýymen ótken sektsııalarda birqatar basqarma basshylary óz salalary boıynsha baıandamalar jasap, bıýdjettiń tórtinshi deńgeıin júzege asyrý úrdisinde jergilikti ózin-ózi basqarýdy damytý, turǵyn úı-kommýnaldyq máselelerin sheshýdegi qala, aýdan, aýyl ákimderiniń róli jaıynda sóz qozǵady.
Eske sala keteıik, elimizde 2018 jyldyń 1 qańtarynan bastap 2 myńnan astam adam turatyn aýdandyq mańyzy bar qalalar, aýyldar men aýyldyq okrýgterde jergilikti ózin-ózi basqarýdyń derbes bıýdjeti men kommýnaldyq menshigin engizý zań júzinde bekitilgeni málim. 2020 jyldan bastap bul normalar barlyq eldi mekenderde kúshine enedi. Salyqtyq jáne salyqtan tys basqa da túsimderdiń 7 túri, sondaı-aq shyǵyndardyń 19 baǵyty aýyl bıýdjetine berildi. Bul jergilikti mańyzy bar máselelerdi sheshýge múmkindik beretini sózsiz. Aqmola oblysy boıynsha 69 selolyq okrýg osy bıýdjet saıasatyna engizilip otyr.
