Kókshetaýda 30 jastaǵy jigit turǵyn úıdiń shatyrynan sekirip ólmek boldy
KÓKShETAÝ. QazAqparat - Kókshetaýda taǵy bir er adam kópqabatty turǵyn úıdiń shatyrynan sekirip ólmek boldy, dep habarlaıdy QazAqparat tilshisi PD baspasóz qyzmetine silteme jasap.
Vedomstvonyń málimetinshe, oqıǵa sáýirdiń 2-de saǵat 15:06 kezinde oryn alǵan. Bul týraly polıtsııaǵa oqıǵa ornynda bolǵan jedel járdem qyzmetiniń dárigeri habarlaǵan. Kýágerlerdiń aıtýynsha, Qudaıberdıev kóshesi, 45 mekenjaıynda ornalasqan bes qabatty úıdiń shatyryna shyqqan jigit jerge sekirmek bolǵan.
«Oqıǵa ornyna dereý jol-patrýl polıtsııa qyzmetkerleri jetti. «Ásker-30» ekıpajy polıtsııa aǵa serjanty Nursultan Kenjebekov pen polıtsııa kapıtany Abzal Isın, polıtsııa serjanttary Saıat Qojahmetov pen Nursultan Jumaǵalıev úıdiń shatyryna kóterilip, bir saǵat boıy júrgizilgen kelissózdiń nátıjesinde jigitti raıynan qaıtardy. Tártip saqshylary jigitti jerge túsirip, jedel járdem qyzmetiniń dárigerlerine tapsyrdy. Aldyn ala málimet boıynsha, 30 jastaǵy jigittiń mundaı qadamǵa barýyna ata-anasymen aradaǵy túsinispeýshilik sebep bolǵan», deıdi vedomstvodan.
Qazirgi kezde jigit emdeý mekemesine jetkizilip, psıhologııalyq kómek kórsetildi. Sondaı-aq, onyń psıhologııalyq dıspanserde esepte turǵany anyqtaldy.
Eske sala keteıik, jaqynda Kókshetaý qalasynda 20 jastaǵy jigit 6 qabatty turǵyn úıdiń shatyrynan sekirmek bolǵan edi. Ony da «Ásker-30» avtopatrýl qyzmetkerleri, aǵa serjant Nursultan Kenjebekov, aǵa serjant Abylaı Ábilov jáne kapıtan Abzal Isın qutqaryp qalǵan bolatyn.
