Kókshetaýda 222 temirjolshy aq qar, kók muzda atqarǵan eńbegi úshin ústemaqy aldy

KÓKShETAÝ. QazAqparat - Kókshetaý kólik prokýratýrasy temirjol salasyndaǵy temirjol qaýipsizdigin qamtamasyz etetin jumysshylardyń eńbek quqyqtarynyń buzylǵandyǵyn anyqtady, dep habarlady atalmysh organnyń baspasóz qyzmeti.

Baspasóz málimetterine qaraǵanda, «Qazaqstan temir joly» ulttyq kompanııasy» AQ-nyń «Aqmola magıstraldik jeli bólimshesi» fılıalynyń jumysshylaryna 2017 jyldyń jeltoqsanynan aǵymdaǵy jyldyń aqpan aılarynda qıyn meteorologııalyq jaǵdaıda nemese - 25-ten gradýstan tómen temperatýrada atqarǵan jumystary úshin eńbekaqylaryna 15% ústemeaqy tóleýi tıis bolǵan. Alaıda bul qarjy jumysshylarǵa tólenbeı kelgen.

«Prokýrorlyq qadaǵalaý sharalarymen 222 temirjolshy 2 mln. teńgeden asa kólemde tıisti qarajattaryn aldy. Eńbek zańnamasy men ujymdyq sharttyń talaptaryn buzǵany úshin mekemeniń jaýapty laýazymdy tulǵasy tártiptik jaýapqa tartyldy»,-dep habarlady Kókshetaý kólik prokýratýrasy.