Kókshetaýda 200 otbasyna jańa páter kilti tapsyryldy

KÓKShETAÝ. QazAqparat - El Táýelsizdiginiń 30 jyldyǵy jáne Konstıtýtsııa kúni qarsańynda Kókshetaý qalasynda birqatar merekelik is-sharalar ótti, dep habarlaıdy QazAqparat tilshisi Aqmola oblystyq ishki saıasat basqarmasyna silteme jasap.

Shara barysynda oblys ortalyǵyndaǵy «Saryarqa» shaǵyn aýdanynda «Nurly jer» baǵdarlamasy boıynsha kezekte turǵandar men halyqtyń áleýmettik osal toptaryna arnap salynǵan jańa úıden 200 otbasy páter kiltteri tapsyryldy. Baspanaly bolǵandardyń arasynda medıtsına qyzmetkerleri de bar.

Qýanysh ıelerin quttyqtaǵan aımaq basshysy Ermek Marjyqpaev osy shaǵyn aýdanda halyqtyń áleýmettik osal toptary úshin taǵy da on eki kóp páterli jalǵa beriletin turǵyn úıdiń, sondaı-aq «Otbasy banki» salymshylary úshin bes kredıttik kóp páterli úıdiń qurylysyn aıaqtaý josparlanǵanyn atap ótti.

Sonymen birge, oblys ortalyǵyndaǵy Qylshaqty ózeniniń jaǵasynda amfıteatr ashyldy. Bul saltanatty sharany ashqan aımaq basshysy barlyq qatysýshylardy Aqmola oblysynyń paýerlıfteri Davıd Degtıarevtiń Tokıoda ótip jatqan Paralımpıada oıyndarynda Qazaqstan quramasynyń qorjynyna salǵan alǵashqy altyn medalimen quttyqtady.

Shara aıasynda óńir basshysy aqmolalyqtarǵa «Eńbek ardageri», «Meıirim», «Eńbek ardageri» medaldaryn, «Densaýlyq saqtaý isiniń úzdigi», «Mádenıet salasynyń úzdigi», «Qurmetti sport qyzmetkeri», «Dene shynyqtyrý jáne sportty damytýǵa qosqan úlesi úshin» tós belgilerin, QR Prezıdentiniń, oblys ákiminiń Alǵys hattaryn, mádenıet jáne sport mınıstriniń Qurmet gramotalaryn tabys etti.

Aıta keteıik, Konstıtýtsııa kúnine oraı oblysta 20-ǵa jýyq áleýmettik jáne ónerkásiptik nysandar paıdalanýǵa beriledi.