Kókshetaýda 20 dáriger páterli boldy
KÓKShETAÝ. QazAqparat - Aqmola oblysynyń ákimi Málik Myrzalın Medıtsına qyzmetkerleri kúnine oraı bir top sala mamandaryna jańa páterdiń kiltin tapsyrdy, dep habarlaıdy QazAqparat tilshisi.
«Kókshetaý» mádenıet saraıynda ótken saltanatty sharada aımaq basshysy quttyqtaý sóz sóılep, aq jeleńdi abzal jandardyń halyqtyń densaýlyǵyn qorǵaý jolyndaǵy qajyrly eńbekterine joǵary baǵa berdi.
«Jylyna bir keletin osy mereke jalǵyz dárigerler qaýymynyń ǵana emes, barsha halyqtyń kóńilinde de jaqsy bir qýanysh sezimin týǵyzatyndyǵy aıqyn. Bul joly da oblystyń medıtsına qyzmetkerleri óz kásiptik merekelerine úlken jetistiktermen kelip otyr», - dedi M.Myrzalın quttyqtaý sózinde.
Saltanatty sharada medıtsına salasynyń damýyna eleýli úles qosqan mamandar «Densaýlyq saqtaý salasynyń úzdigi», «Densaýlyq saqtaý salasyna qosqan úlesi úshin» tósbelgilerimen jáne «Eńbek ardageri» medalimen marapattaldy. Olardyń qatarynda Q.Qurmanbaev atyndaǵy oblystyq týberkýlezge qarsy kúres dıspanseriniń sarapshy dárigeri Sáýle Soltanbekova, jedel járdem stansasynyń qyzmetkeri Láılá Aıtjanova, Zerendi aýdandyq aýrýhanasynyń terapııa bóliminiń meńgerýshisi Gúlnár Jaqypova, Kókshetaý qalalyq emhanasynyń bas dárigeri Ǵalııa Sabataeva Tselınograd aýdandyq aýrýhanasynyń bólim meńgerýshisi Zámzágúl Erjanovalar bar.
Sondaı-aq, oblys ákiminiń Alǵys hattarymen Bulandy aýdandyq aýrýhanasy bas dárigeriniń orynbasary Olga Býgaı, Sandyqtaý aýdandyq aýrýhanasynyń anestezıolog-reanımotology Vladıslav Zınovev jáne birqatar qalalyq jáne aýdandyq aýrýhanalardyń dárigerleri marapattaldy. Oǵan qosa baspanaǵa muqtaj medıtsına salasynyń 20 qyzmetkeri jańa páterdiń kiltine ıe boldy.
Saltanatty jıyn sońy jergilikti ónerpazdardyń oryndaýyndaǵy merekelik kontsertke ulasty.
