Kókshetaýda 2 myń adamǵa 10 sotyq jerden beriledi
ASTANA. QazAqparat - Aqmola oblysynda jeke turǵyn úı qurylysy úshin óńir turǵyndaryna jer telimderin bólý jumysy kúsheıtilmek, dep habarlaıdy «QazAqparat» HAA tilshisi.
«Men bul jumystyń bastalyp ketkenin, al kelesi jyly osy baǵytta aıtýly josparlar baryn atap ótkim keledi. Tek Kókshetaý qalasynda ǵana biz kelesi jyly 2 myń jer ýchaskesin bóletin bolamyz», - dedi Aqmola oblysynyń ákimi Málik Myrzalın OKQ-da ótken baspasóz máslıhatynda.
Onyń aıtýynsha, bıylǵy jyly Kókshetaýda tuńǵysh ret turǵyndarǵa 10 sotyq aýmaǵyndaǵy 218 ýchaske bólingen. Keleshekte Aqmola oblysynyń 14 eldi mekenindegi 7 myń úıge ınjenerlik kommýnıkatsııa tartý josparlanyp otyr.
Sonymen qatar, ákimniń aıtýynsha, jyldyń aıaǵyna deıin kezekte turǵan Turǵyn úı jınaq banki baǵdarlamasyna qatysýshylaryna 6 kóppáterdi úıdi tapsyrý kózdelýde. 2018 jyly baǵdarlama sheńberinde 20 kóppáterli jalǵa beriletin jáne nesıelik turǵyn úı turǵyzý josparlanǵan.
Sonymen qatar, jeńildetilgen nesıe men ıpotekalyq qaryz esebinen salynatyn turǵyn úı qurylysynyń mehanızmi iske qosylǵan. Osy baǵytta Aqmol aýylynda 10 kóppáterli turǵyn úı qurylysy jáne Tselınograd aýdanynyń Qabanbaı batyr aýylynda 200 jeke turǵyn úı salynatyn bolady.
