Kókshetaýda 19 sot oryndaýshysy jaýapqa tartyldy
ASTANA. KAZINFORM – Kókshetaý qalasynyń prokýratýrasy atqarýshylyq is júrgizý salasynda azamattardyń, memlekettiń jáne kámeletke tolmaǵandardyń quqyqtaryn qorǵaý baǵytynda turaqty negizde jumys júrgizip keledi, dep habarlaıdy Aqmola oblystyq prokýratýrasynyń baspasóz qyzmeti.
Jyl basynan beri alıment tóleýden jaltarǵan 32 boryshker QR ÁQBtK-niń 669-baby boıynsha ákimshilik jaýapqa tartyldy. Qabyldanǵan sharalardyń nátıjesinde 60 mln teńgeden astam alıment óndirildi.
Sonymen qatar, 20 kásiporyn qyzmetkeriniń eńbek quqyqtary qorǵaldy. 20,2 mln teńge kólemindegi jalaqy boıynsha bereshek tolyq óteldi.
Sot oryndaýshylarynyń qyzmetinde májbúrlep oryndatý sharalaryn ýaqtyly qabyldamaýǵa baılanysty zań buzýshylyqtar anyqtaldy. Jol berilgen zań buzýshylyqtar úshin 19 sot oryndaýshysy tártiptik jaýaptylyqqa tartyldy.
-Prokýratýra qabyldaǵan sharalar azamattardyń buzylǵan quqyqtaryn qalpyna keltirýge jáne sot aktileriniń oryndalý tıimdiligin arttyrýǵa yqpal etti,-delingen habarlamada.
Osyǵan deıin Almatyda jeke sot oryndaýshysy zań buzǵany úshin lıtsenzııasynan aıyrylǵany týraly jazdyq.
