Kókshetaýda 15 kólikti tonaǵan kúdiktiler ustaldy
KÓKShETAÝ. QazAqparat - Kókshetaýda uzaq ýaqyt kólik tonaýdy kásip etkender ustaldy. Qazirgi kezde kúdiktilerdiń 15 qylmysqa qatysy bary dáleldenip otyr, dep habarlaıdy QazAqparat tilshisi ІІD baspasóz qyzmetine silteme jasap.
Polıtseılerdiń deregi boıynsha 20 qyrkúıekte kúni túnde jol qozǵalysyn baqylap júrgen jol-patrýldik polıtsııa batalonynyń qyzmetkerleri Kókshetaý qalasynyń J.Táshenov jáne O.Qýanyshev kósheleriniń qıylysynda «BMW 912» kóligin toqtatqan. Sol kezde kólik ishinde 22 jas shamasyndaǵy júrgizýshi men jolaýshy boldy. Olardyń qujattaryn tekserý kezinde kóliktiń júk salǵyshynan jeńil kóliktiń akkmýlıator batareıasy tabyldy. Kókshetaý qalalyq ІІB jetkizilgen jas jigitter avtokólik bólshekterin qaıdan alǵanyn túsindirip aıta almady. Keıin belgili bolǵandaı kúdiktiler 2 aı boıy oblys ortalyǵy aýmaǵynda kólikterdi tonaýmen aınalysyp kelgen.
«Kúdiktiler qoldan jasalǵan arnaıy quralmen kóliktiń esigin ashyp, júrgizýshiniń jeke zattary, akkmýlıatory, aına, jaryq shamdary, qosalqy dóńgelek sııaqty bólshekterin urlap kelgen. Buǵan qosa, júrgizýshiniń ámııany, shaǵyn sómkelerin (barsetke) qoldy qylyp otyrǵan», dep túsindirdi baspasóz qyzmetindegiler.
Qazirgi kezde kúdiktilediń Kókshetaý qalasy aýmaǵynda avtokólik tonaý boıynsha 15 qylmysqa qatysy bar dáleldendi. QR QK 188-babynyń 2-bóligi boıynsha is qozǵalyp, sotqa deıingi tergeý amaldary júrgizilýde.
