Kókshetaýda 136 mıllıon teńge jınaǵan qarjy pıramıdasy áshkere boldy

ASTANA. KAZINFORM – Qarjy monıtorıngi agenttiginiń Aqmola oblysy boıynsha departamenti prokýratýranyń úılestirýimen Kókshetaý qalasynda jumys istegen «S-Group» qarjy pıramıdasynyń qurylymdyq bólimshesiniń basshylaryna qatysty tergeýdi aıaqtady.

Tergeý derekterine sáıkes, uıymdastyrýshylar «S-Pharmaceutical» jáne ózge de jobalarǵa medıtsınalyq kannabıs óndirisi men dıstrıbýtsııasyna ınvestıtsııa tartý syltaýymen azamattardy aldaǵan. Olar salymshylarǵa árbir jańadan tartylǵan qatysýshyǵa salym somasynyń 5 paıyzy mólsherinde kepildendirilgen tabys ýáde etken.

- Qarjy pıramıdasyna qatysý úshin saıt arqyly tirkelip, keminde 100 AQSh dollarynan bastap salym jasaý talap etilgen.

Kúdiktilerdiń biri buǵan deıin «Life Is Good» jáne «Finiko» qarjy pıramıdalaryna qatysyp, sol jerden tabys taýyp, keıin uqsas shema arqyly óz jobasyn qurǵan.

Nátıjesinde «S-Group» qarjy pıramıdasyna 59 azamat tartylyp, olar jalpy 136 mıllıon teńgeden astam qarajat salǵan, - delingen aqparatta.

Kúdiktiler salymshylardyń aqshasyna elordadan eki páter men avtoturaq ornyn satyp alǵan. Bul múlikke sottyń sanktsııasymen tyıym salyndy.

Úsh uıymdastyrýshyǵa qatysty qozǵalysyn shekteý jáne tártip saqtaý týraly qolhat túrindegi bultartpaý sharasy qoldanylǵan.

Qylmystyq-protsestik kodekstiń 201-babyna sáıkes, ózge aqparat jarııalaýǵa jatpaıdy.

Aıta keteıik, jaqynda «Boxy Wealth» qarjy pıramıdasynyń qyzmeti toqtady.