Kókshetaýda 100 otbasy renovatsııa baǵdarlamasy aıasynda jańa páterge ıe boldy
KÓKShETAÝ. KAZINFORM - Qazaqstan Konstıtýtsııasynyń 30 jyldyǵy qarsańynda Kókshetaýda eski úılerden qonys aýdarǵan turǵyndarǵa jańa páter kiltin tabystaý rásimi ótti.
Kópten kútken jaıly baspanany shamamen 100 kókshetaýlyq otbasy «Jańa Shańyraq» turǵyn úı kesheni men Vernadskıı kóshesindegi jańa turǵyn úı kesheninen aldy. Renovatsııa baǵdarlamasyna qatysýshylar úshin memleket arnaıy páterler satyp alǵan.
Aqmola oblysynyń ákimi Marat Ahmetjanov saltanatty is-sharada óńir turǵyndaryn búgingi qýanyshty oqıǵamen quttyqtady.
– Bul – úlken birlesken jumystyń nátıjesi. Bizdiń oblys elimizde alǵashqylardyń biri bolyp renovatsııa baǵdarlamasyn júzege asyra bastady. Joba adamnyń basty qajettilikteriniń biri – qolaıly ınfraqurylymǵa degen suranysyn qamtamasyz etedi. Eski turǵyn úıler tarıh qoınaýyna ketip, olardyń ornynda jańa ári zamanaýı shaǵynaýdandar boı kótergen. Búgin Kókshetaýda shamamen júz otbasy kópten kútken baspanasyna qol jetkizip jatyr. Bul – árbir otbasy úshin jańa ómirdiń bastaýy, – dedi óńir basshysy.
Aıta ketý kerek, renovatsııa jobalary bıýdjet qarjysynsyz júzege asyrylyp jatyr. Bul – memleket pen bıznestiń tıimdi áriptestiginiń nátıjesi. Oblys ákimidigi, SPK «KOKSHE» jáne qurylys kompanııalary birlesip qabyldaǵan sheshimdi búginde Qazaqstannyń ózge óńirleri de zerdelep jatyr.
Sonymen qatar áleýmettik osal toptardy sapaly turǵyn úımen qamtamasyz etý, onyń ishinde renovatsııa baǵdarlamasy boıynsha júrgizilip jatqan jumystar el Prezıdenti tarapynan oń baǵasyn aldy.
Qazir baǵdarlama tek oblys ortalyǵynda ǵana emes, sondaı-aq Şýchınsk, Makınsk qalalarynda, Arshaly men Zerendi kentterinde de tabysty iske asyrylyp jatyr.
– Mundaı tásil – senim, yntymaqtastyq pen ortaq jaýapkershilik bolǵan jaǵdaıda úlken maqsattarǵa qol jetkizýge bolatynyn kórsetetin úlgi, – dedi oblys ákimi óz sózinde.
Jańa páterge qol jetkizgen qala turǵyny Evdokııa Delfman qýanyshyn bólisti.
– Bıyl kóktemde bizge jańa úıge kóshetinimizdi aıtqanda birden kelistik. Mine, arada jarty jyl ótpeı, jaryq ta jaıly páterge qonys aýdaryp otyrmyz. Memleketke jáne osy iske atsalysqandardyń bárine alǵysymyz sheksiz. Búgin bizdiń armanymyz oryndaldy! – dedi ol.
«Jańa Shańyraq» turǵyn úı kesheni Ýálıhanov–Bykovskıı–Saın–Tilendıev kósheleriniń sharshy aýmaǵynda salyndy. Munda 2024 jyldyń qarasha aıynda alty eski úı súrilgen bolatyn. Al Vernadskıı kóshesindegi jańa úı 2024 jyldyń sáýirinde súrilgen eski úılerdiń ornyna turǵyzyldy.
Investorlar retinde jergilikti qurylys kompanııalary qatysyp otyr. Úıler zamanaýı standarttarǵa saı salynǵan: barlyq ınjenerlik kommýnıkatsııa júrgizilgen, aýla abattandyrylǵan, balalar alańdary men fýtbol alańy bar. Sondaı-aq barak úlgisindegi eski úılerdiń ornyna turǵyndar serýendep, demalatyn skver paıda bolady.
Baǵdarlamaǵa qatysýshylar úshin bul tek qonys aýdarý ǵana emes – ómirindegi jańa kezeńniń bastalýy. Jyldar boıy eski ári apatty úılerde turǵan kóptegen otbasy alǵash ret zamanaýı talaptarǵa saı jaıly ári qaýipsiz turǵyn úıge qol jetkizdi.
Aıta keteıik, Kókshetaýdaǵy jylý kózin jóndeýge Úkimet rezervinen 1 mlrd teńgeden astam qarjy bólindi.
