Kókshetaý ýnıversıtetiniń rektory: Medıtsına kadrlaryn daıarlaý - zor jaýapkershilik
KÓKShETAÝ. QazAqparat - Medıtsına kadrlaryn daıarlaý orasan zor jaýapkershilikti jáne qyrýar qarjyny talap etedi. Bul týraly QazAqparat tilshisine bergen suhbatynda Shoqan Ýálıhanov atyndaǵy Kókshetaý memlekettik ýnıversıtetiniń rektory Marat Syrlybaev aıtty.
Rektordyń aıtýynsha, Sh.Ýálıhanov atyndaǵy Kókshetaý memlekettik ýnıversıteti elimizdegi birden-bir kópbeıindi oqý orny sanalady. Jarty ǵasyrdan astam tarıhy bar joǵary bilim ordasynda muǵalimder, ınjenerler, aýyl sharýashylyǵy qyzmetkerleri jáne qyzmet kórsetý salasynyń mamandary daıarlanýda. Soǵan qaramastan medıtsınalyq fakýltet ashý sheshimine kelý ýnıversıtet úshin tolǵanysty másele bolǵandyǵy belgili. Buryn sońdy múldem bolmaǵan medıtsınalyq fakýlteti ashýǵa Memleket basshysy Nursultan Ábishuly Nazarbaevtyń 2017 jylǵy 31 qańtardaǵy «Qazaqstannyń úshinshi jańǵyrýy: jahandyq básekege qabilettilik» atty Joldaýy sebepshi bolǵan.
«Joldaýdaǵy mindetterdi oryndaý maqsatynda Aqmola oblysy ákimi Məlik Myrzalınniń tikeleı tapsyrmasymen ýnıversıtet janynan «Jalpy medıtsına» fakýltetin ashtyq. Bul ərıne, oblysymyz úshin aıtýly oqıǵa», - deıdi Marat Syrlybaev.
Sonymen qatar, rektor jańa fakýltetke qujat tapsyrýshylar da grant ıegerleriniń de qatary kóp bolǵanyn atap ótti.
«Ýnıversıtet 2018-2019 oqý jylyna 172 abıtýrıentti qabyldady. Olardyń qatarynda Bilim jáne ǵylym mınıstrliginiń 12, Aqmola oblysy ákiminiń 50 grant ıegeri bar. Al, 110 stýdent kelisimshart negizinde oqysa, Bulandy, Zerendi, Birjan sal, Astrahan, Sandyqtaý aýdandary 11 grant bólip otyr, 6 stýdentimiz zańdy tulǵalar men demeýshiler qarjysy esebimen tálim alýda. Stýdentterdiń 15-iniń kolledj bitirgendigi týraly dıplomy bolsa, jedel járdem qyzmetiniń 8 ókili bilimin tolyqtyratyn bolady», - dep tolyqtyrdy Marat Syrlybaev
Aıta keteıik, «Jalpy medıtsına» mamandyǵy boıynsha oqýǵa túsken 172 stýdenttiń 140-y Aqmola oblysynyń turǵyndary ekendigin atap ótýge bolady. Bulardyń ishinde 61 grant ıegerlerimen úsh jaqty kelisimshart jasalǵandyqtan olardyń barlyǵy týǵan jerinde keminde 3 jyl jumys isteýge mindetti.
Internatýranyń 1 kýrsyna 12 adam qabyldansa, onyń altaýy Bilim jáne ǵylym mınıstrliginiń grantymen oqyp júr. Internatýraǵa qabyldanǵandar arasynda tórt-tórtten hırýrg pen jalpy praktıka dárigeri, 2 terapevt, bir-birden akýsher-gınekolog pen balalar dárigeri bar.
Oǵan qosa ýnıversıtet sheteldik stýdentterdi oqytý jónindegi kompanııamen 150 adamdy qabyldaý týraly kelisimshartqa qol qoıǵan.
«Sheteldik stýdenttermen sabaq aǵylshyn tilinde júrgiziletin bolǵandyqtan oqytýshylar quramyn jasaqtap, aýdıtorııalar men kabınetterdi jabdyqtadyq. Jalpy, medıtsına kadrlaryn daıarlaý orasan zor jaýapkershilikti talap etedi jáne qyrýar qarjyny qajetsinedi. Sondyqtan, ýnıversıtetimiz MCI (Úndi medıtsına keńesi) quramyna tirkeldi. Osy kelisim shart boıynsha kompanııa stýdentterdi jataqhanamen jáne qaýipsizdik sharalarymen qamtamasyz etedi. Jaqynda sheteldik stýdentterdiń alǵashqy legi kele bastaıdy», - dep qorytyndylady Marat Syrlybaev sózin.
