Kókshetaý ýnıversıtetinde órt shyǵyp, 2,4 myńǵa jýyq adam evakýatsııalandy
KÓKShETAÝ. QazAqparat – Kókshetaý ýnıversıtetinde órt bolyp, 2,4 myńǵa jýyq adam qaýipsiz jerge kóshirildi, dep habarlaıdy QazAqparat tilshisi aımaqtyq TJD baspasóz qyzmetine silteme jasap.
Vedomstvonyń málimetinshe, 7 qarasha kúni saǵat 11:15-de qutqarý qyzmetine Sh.Ýálıhanov atyndaǵy Kókshetaý memlekettik ýnıversıtetiniń basty korpýsynda tútin shyqqany týraly aqparat túsken.
«Oqıǵa ornyna jetken órt sóndirýshiler bilim ordasy ǵımaratynyń jertólesindegi jeldetkish shahtasynda, 2 sharshy metr aýmaqta órt shyqqanyn anyqtady. Órt sóndirýshiler kelgenshe, ýnıversıtet jumsyshylary óz kúshimen tilsiz jaýdy aýyzdyqtap úlgerdi. Sonymen qatar, olar 2000 stýdent pen 400 qyzmet kórsetý personalyn qaýipsiz jerge shyǵardy. Zardap shekkender joq», - dep túsindirdi Aqmola oblystyq TJD bastyǵynyń orynbasary Qanat Dospaev.
Oqıǵa ornyna TJD jeke quramynan 53 qyzmetker men 13 arnaıy tehnıka jumyldyryldy. Departament basshysy atap ótkendeı, oqıǵa boıynsha is materıaldary Kókshetaý qalalyq PB joldanady.
