Kókshetaý turǵyny urlap áketken kóligimen aıaldamany jáne dúkendi soǵyp qıratty

KÓKShETAÝ. QazAqparat - Kókshetaýda 25 jastaǵy er adam mas kúıinde kólik urlap, polıtsııanyń eskertýine qulaq aspaı, avtobýs aıaldamasyn jáne dúkendi soǵyp qıratty. Polıtsııa sotqa deıingi óndiristik is qozǵady, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.

Vedomstvonyń málimetinshe, 3 tamyz saǵat 21:35 shamasynda Kókshetaý qalalyq polıtsııa basqarmasynyń kezekshi bólimine «Ásker-61» patrýldik polıtsııa ekıpajy ınspektorynan habar túsken.

Ol Áshimov kóshesi boıynda Nissan Primera avtokóliginiń júrgizýshisi polıtsııa qyzmetkerleriniń eskertýine toqtamaǵany jáne rýldi basqara almaı avtobýs aıaldamasy men dúkenge soǵylǵanyn jetkizgen.

Anyqtalǵandaı, sol kúni saǵat 18:00 shamasynda 25 jastaǵy er adam Kókshetaý qalasyndaǵy jergilikti úılerdiń biriniń aýlasynda turǵan Nissan Primera-ny urlap áketken, keıin jol apatyna ushyraǵan.

Oqıǵa ornyna kelgen jedel járdem qyzmetkerleri er adamnyń moıyn omyrtqasy men keýde qýysyna soqqy alǵanyn anyqtady.

Er adam Kókshetaý qalalyq PB ýaqytsha ustaý oqshaýlaǵyshyna qamaldy.

«Osy oqıǵaǵa baılanysty Qylmystyq kodekstiń 200-baby boıynsha sotqa deıingi is qozǵaldy. Budan bólek, kúdiktige Ákimshilik quqyq buzý kodeksiniń 613-baby, 599-baby jáne 608-babynyń 6-bóligi boıynsha ákimshilik hattama toltyryldy», - dedi vedomstvodan.

Aıta ketsek, budan buryn áleýmettik jelide turǵyndarǵa balaǵat sóz aıtqan Şýche ákimine qatysty qyzmettik tekseris júrip jatqanyn habarlaǵan edik.