Kókshetaý turǵyny túıneme aýrýyn juqtyrmaǵan - dárigerler
KÓKShETAÝ. QazAqparat - Kókshetaýda aýrýhanaǵa jatqyzylǵan turǵyn túıneme juqtyrmaǵan, dep habarlaıdy QazAqparat tilshisi Aqmola oblystyq taýarlar men qyzmetterdiń sapasyn jáne qaýipsizdigin baqylaý departamentine silteme jasap.
Keshe ǵana áleýmettik jelide túıneme juqtyrǵan aqmolalyq týraly beınejazba taraǵan bolatyn. Muny Aqmola oblystyq taýarlar men qyzmetterdiń sapasyn jáne qaýipsizdigin baqylaý departamentindegiler rastamady.
«2020 jylǵy qańtardyń 12-sinde Kókshetaý qalalyq basqarmasyna 32 jastaǵy jergilikti turǵynnyń «Sol jaq ıyq tusyndaǵy ınfektsııaly jara. Bastalyp kele jatqan lımfangıt. Sol jaq qoltyǵynyń astynda lımfangıt. Sibir jarasynyń karbýnkýly» dıagnozymen aýyratyny jóninde shuǵyl habar túsken. Osyǵan baılanysty Aqmola oblystyq taýarlar men qyzmetterdiń sapasyn jáne qaýipsizdigin baqylaý departamenti men oblystyń veterınarlyq qyzmeti shuǵyl túrde sanıtarlyq-epıdemııalyq jáne epızootıkalyq keshendi sharalar júrgizdi. Zerthanalyq tekserý naýqastan úshin materıal alyndy. Baılanys jasaǵan ortasy anyqtaldy. Taǵamǵa qoldanǵan etten synama alyndy. Nátıjesinde túıneme aýrýy rastalmady» deıdi vedomstvodan.
13 qańtarda zerthanalyq tekseristiń nátıjesinde naýqasqa basqa - «ıyǵy men qoltyq terisindegi erıtematozdy-býllezdi tilme» dıagnozy qoıyldy.
«Qazirgi kezde naýqastyń jaǵdaıy birqalypty, negizgi aýrýy boıynsha stantsıonarlyq em alyp jatyr»,- dep tolyqtyrdy Aqmola oblystyq taýarlar men qyzmetterdiń sapasyn jáne qaýipsizdigin baqylaý departamentindegiler.
