Kókshetaý turǵyny tapshy dárilerdi túnde tyǵylyp satqan
KÓKShETAÝ. QazAqparat - Kókshetaýda dárilik preparattardyń zańsyz satylǵany anyqtaldy, dep habarlaıdy QazAqparat tilshisi Aqmola oblystyq Polıtsııa departamentiniń baspasóz qyzmetine silteme jasap.
Vedomstvodan atap ótkendeı, Memleket basshysynyń dári-dármekterdi zańsyz baǵa qosyp satqandardy anyqtap, jaýapqa tartý týraly tapsyrmasyna oraı, aqmolalyq polıtseıler jedel aldyn alý sharasyn bastady.
«6 shildede polıtsııa qyzmetkerleri Kókshetaý qalasynyń 42 turǵynynyń dárilik prepattardy baǵa qosyp satyp jatqandyǵyn anyqtady. Olardyń arasynda óz úıinde «dárihana» ashyp, túngi ýaqytta preparattardy satýmen aınalysqan er adam bar. Jedel aldyn alý sharasy kezinde kásipker ustalyp, onyń zańǵa qaıshy qyzmeti áshkerlendi», - dep atap ótti departamentten.
Ustalǵan adamnyń úıin tintý kezinde aqsha men dárilik preparattar: 30 qorap Ibýfen, 10 qorap Asperın jáne 10 qorap Paratsetamol tabletkalary tárkilendi. Osyǵan baılanysty QR QK-niń 214-baby 1-bóligi (zańsyz kásipkerlikpen aınalysý) boıynsha sotqa deıingi tergeý amaldary qolǵa alyndy. Tergeý sharalary jalǵasýda.
