Kókshetaý turǵyny ata-anasynyń úıinde qarasora ósirgen

KÓKShETAÝ. QazAqparat - Kókshetaý qalasynda dánerkeleýshi bolyp jumys isteıtin 24 jastaǵy turǵyn qoldan qarasora ósirýge arnalǵan boks qorap jasaǵan. Osy úshin ol qylmystyq jaýapqa tartylýda, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.

«Kókshetaý qalasynyń tehnıkalyq jóndeý ortalyǵynda dánekerleýshi bolyp jumys isteıtin jergilikti turǵyn ata-anasynyń jeke úıinde esirtki tuqymdas qarasora ósirýmen aınalysqan. Úıdi tekserý kezinde bólmelerdiń birinde tabylǵan qoldan jasalǵan qoraptyń ishinen qarasoraǵa uqsas ósimdik shyqty. Sonymen birge, qara topyraq pakettelgen tyńaıtqysh qaptamalary, klımat-baqylaý qondyrǵysy, ósimdikterdi kútý kestesi jáne fıtolaboratorııanyń basqa da jabdyqtary tárkilendi», - dep túsindirdi Aqmola oblysy polıtsııa departamentiniń Esirtki bıznesine qarsy kúres basqarmasyndaǵylar.

Er adam ustalǵan kezde esirtkige mas kúıde boldy. Onyń sózinshe, tárkilengen ósimdikter úsh túrli sortqa jatady jáne ony birneshe aı buryn Internet arqyly tapsyryspen alǵan.

«Osyǵan baılanysty Qylmystyq kodekstiń 300 baby «Quramynda esirtki bar, ósirýge tyıym salynǵan ósimdikterdi zańsyz ósirý» boıynsha qylmystyq is qozǵaldy. Saraptama taǵaıyndaldy», - dep tolyqtyrdy vedomstvodan.