Kókshetaý turǵyndary qalada aýyzsýdyń sapasy syn kótermeıtinin aıtty

KÓKShETAÝ. QazAqparat - Aqmola oblysy boıynsha Sybaılas jemqorlyqqa qarsy is-qımyl departamentiniń qyzmetkerleri men Kókshetaý qalalyq Qoǵamdyq keńesiniń músheleri memlekettik organdarmen birlesip óńirdiń Sybaılas jemqorlyq táýekelderiniń kartasyn iske asyrý sheńberinde sýmen jabdyqtaý júıesiniń jumys sapasyna kóshpeli monıtorıng júrgizdi, dep habarlaıdy QazAqparat tilshisi.

Sybaılas jemqorlyqqa qarsy is-qımyl departamenti baspasóz qyzmetiniń málimetinshe, monıtorıng barysynda jurtshylyq ókilderi Shaǵalaly sý qoımasyna, Krasnoıar aýylyndaǵy uńǵymaǵa, sondaı-aq Kókshetaý qalasynyń tazartý qurylystaryna bardy.

Qalany sýmen jabdyqtaý Shaǵalaly sý qoımasynan jáne Kókshetaý toptyq sý qubyrynan (Sergeev sý qoımasynan sý tartýmen) júzege asyrylady.

«Kókshetaý toptyq sý qubyry arqyly qalany sýmen qamtý jumystary belgili bir sebepter boıynsha tolyq kólemde júzege asyrylmaıdy, al aýyz sýdy tutynýshylar bolsa, jyldan jylǵa artyp keledi. Sondyqtan kásiporyn Shaǵalaly sý qoımasynan sýdy paıdalanýǵa májbúr, biraq onyń tazartý qondyrǵylaryna 50 jyldan astam ýaqyt bolǵan, ıaǵnı kúrdeli jóndeýdi qajet etedi. Munyń bári aýyz sýdyń sapasyna áser etedi, osylaısha qala turǵyndarynyń kóptegen negizdelgen syndary jáne shaǵymdaryn týdyrady», - dep túsindirdi «Kókshetaý sý arnasy» kommýnaldyq kásipornynyń basshylyǵy.

Aıta keteıik, bıylǵy jyldyń qarasha aıynda Kókshetaý qalasynyń Qoǵamdyq keńesiniń otyrysynda jurtshylyq pen memlekettik organdar halyqty sapaly sýmen jabdyqtaý, atap aıtqanda, qalalyq sý tazartý stantsııasyn qaıta jańartý jáne jańa tazartý qurylystaryn salý máselelerin kótergen bolatyn.

Osy rette, «Kókshetaý sý arnasy» kommýnaldyq kásipornynyń basshylyǵy 2009-2010 jyldary ázirlengen tazartý qurylystaryn jóndeý jobasy birneshe ret túzetilgen jáne qazirgi ýaqytta taǵy túzetý engizilip jatqandyǵyn atap ótti.

«Turǵyndardy taza sýmen qamtamasyz etý maqsatynda kásiporyn Pavlovsk sý qoımasyndaǵy jumystardy qaıta bastaýdy, sondaı-aq Shaǵalaly sý jınaýdyń úshinshi jelisin ótkizýdi usynady», - dep qosty kásiporyn basshylyǵy.

Kóshpeli monıtorıng qorytyndysy boıynsha jumys toby Pavlovsk sý qoımasyn qalpyna keltirý boıynsha jumystardy júrgizýge, Kókshetaý qalasy men Krasnoıar aýyldyq okrýginde jańa qosymsha uńǵymalardy ashýǵa, sondaı-aq tazartý qurylystaryn jóndeý jónindegi jospardy ázirleýge qatysty usynystar ázirledi. Bul máseleler jurtshylyqtyń baqylaýyna alyndy. Sonymen birge, bul saladaǵy máseleler oblystyń Sybaılas jemqorlyq táýekelderiniń kartasynda kórsetilgen.