Kókshetaý tehnıkalyq ınstıtýtynyń 20-shy túlekterine dıplom tapsyryldy
KÓKShETAÝ. QazAqparat - Kókshetaý tehnıkalyq ınstıtýtynyń 20-shy túlekterine dıplom tapsyryldy, dep habarlaıdy QazAqparat tilshisi.
Kókshetaýdaǵy Táýelsizdik alańynda uıymdastyrylǵan saltanatty sharaǵa QR ІІM Tótenshe jaǵdaılar komıtetiniń tóraǵasy Vladımır Bekker, Aqmola oblysy ákiminiń orynbasary Vasılıı Krylov, órt sóndirý qyzmetiniń ardagerleri, dıplom alyp jatqan kýrsanttardyń týystary men jaqyndary keldi.
Quttyqtaý sóz sóılegen Vladımır Bekker túlekterdiń qýanyshtaryna ortaqtasyp, aldaǵy qıyn da jaýapty qyzmetterine sát-sapar tiledi.
«Jańa ómirge qadam basqan túlekter úshin búgin - óte erekshe kún. Jas órenderimiz óz ómirleriniń eń jaýapty sátin bastan keshirýde. Tórt jyl boıy oqý ordasynda sapaly bilim alǵan ulandar ǵana elimizdi tótenshe jaǵdaılardan saqtap qala alady, - dedi Vladımır Bekker.
Bul kúni atalǵan ınstıtýttyń 108 túlegi dıplom alsa, 34 kýrsant Reseıdiń TJM Órtke qarsy memlekettik akademııasynyń dıplomyn aldy. Túlekter Qazaqstan Respýblıkasy Tótenshe jaǵdaılar komıtetiniń aýmaqtyq organdary men basqa da quqyq qorǵaý qurylymdaryna arnaıy joldamamen jumysqa jiberiletin boldy.
Eske sala ketsek, Kókshetaý tehnıkalyq ınstıtýty Qazaqstandaǵy órt qaýipsizdigi salasynda bilikti maman-kadrlyq ofıtserler daıarlaıtyn jalǵyz arnaıy oqý orny bolyp tabylady. Instıtýt qabyrǵasynan dıplom alyp shyqqan kýrsanttar elimizdiń kez kelgen jerine órtke qarsy qyzmetke alynyp, salanyń damýyna edáýir úles qosady.
