Kókshetaý sý arnasy ınnovatsııalyq ádispen «jasyl» energııa óndirýdi qolǵa almaq
KÓKShETAÝ.QazAqparat- «Kókshetaý sý arnasy» kommýnaldyq kásiporyny ınnovatsııalyq jolmen týrbogeneratordy iske qosýdy josparlap otyr. Bul týraly kásiporyn basshysy Zeınur Álibekov aıtty, dep habarlaıdy QazAqparat tilshisi.
Kásiporyn basshysynyń sózinshe, sý týrbınasy negizindegi shaǵyn sý elektr stantsııasynyń ınnovatsııalyq konstrýktsııasyn jasaý arqyly «jasyl» energııanyń avtonomdyq jáne júıelik óndirisi júzege asyrylmaqshy. Kásiporynyń óz qajettilikterin óteıtin derbes elektr energııasyn óndirý tarıfterdiń ósýine tosqaýyl bolmaq. Jaqynda joba ıelerimen kezdesý josparlanyp otyr.
«EKSPO-2017» kórmesinde kóptegen ınnovatsııalyq jobalar usynyldy. Bul jobalardyń 5-ýin bizdiń Aqmola oblysynda júzege asyrý qarastyrylyp otyr. Sonyń biri, ınnovatsııalyq jolmen sý qubyryn tazalaý stansasynda týrbogenerator ornatyp, óz qajetilikterimizdi óteıtin elektr qýatyn óndirý. Ázirge, naqty qandaı jobany júzege asyratynymyz belgisiz. Bizdi «EKSPO-2017» kórmesinde usynylǵan shvetsııalyq fırmanyń 40 kılovattan 250 megavatqa deıin elektr energııasyn óndirý jobasy qyzyqtyrdy. Biraq bizdiń sý shyǵynymyz 21000 tekshe metrdi quraıdy, al, shvedtikterdiki 50000-100000 metr sý shyǵynyn talap etedi. Sol sebepti, bul joba áli de pysyqtalýda. Eger de, aldaǵy ýaqytta bizdiń talaptarǵa saı kelip jatqan joba bolyp jatsa júzege asyrýǵa daıynbyz», dedi kásiporyn basshysy Zeınur Álibekov.
Sonymen qatar, kásiporyn basshysy Eýropalyq qaıta qurý jáne damý bankiniń de Kókshetaý qalasynyń kommýnaldyq nysandaryna qarjy quıýǵa qulshynyp otyrǵanyn atap ótti. Onyń ishinde Kókshetaý qalasyn sýmen jabdyqtaý jobasyn pılottyq joba retinde júzege asyrylý qarastyrylǵan. Bul joba da dál qazirgi kezde pysyqtalý ústinde.
Eske sala keteıik, «Kókshetaý sý arnasy» kommýnaldyq kásiporyny 2016-2020 jyldarǵa arnalǵan uzaq merzimdik ınvestıtsııalyq jobasyn júzege asyrýda. Joba sheńberinde 2016 jyly sýmen qamtamasyz etý jáne sý aǵyzý boıynsha 102,8 mıllıon teńgeniń ınvestıtsııalyq sharalary oryndaldy. Onyń ishinde 12,1 shaqyrym kvartalishilik sý qubyrlary men káriz júıeleri aýystyryldy. Oǵan qosa, sý tazalaý stansasynda kvarts qumy salynǵan jáne metall konstrýktsııasymen birge 3 súzgishke kúrdeli jóndeý jumystary júrgizildi.
Kásiporyn Kókshetaý qalasymen birge, Krasnoıar jáne Stantsıonnyı kentteri aýyz sýmen qatamasyz etedi. Sý kózi Kókshetaý sý qubyry jáne Shaǵalaly sý qoımasy arqyly alynady. Sondyqtan tutynýshylardy sapaly aýyz sýmen qamtamsyz etý maqsatynda Shaǵalaly sý qoımasynan alynatyn sý súzgish stansasynda tazartylady. Oǵan qosa, Kaptsevıch kóshesiniń boıyndaǵy sý qubyry jańartyldy, Vorovskıı kóshesiniń boıyna sý qubyry tartyldy. Nátıjesinde 48 jáne 19 jańa abonentter bir ortalyqtandyrylǵan sýmen qamtamasyz etý júıesine qosyldy. Sondaı-aq, ınvestıtsııalyq baǵdarlama sheńberinde káriz júıesiniń tozyǵy jetken ýchaskelerdegi qubyrlar aýystyrylyp, jańa sorǵyshtar ornatyldy. Jalpy, «Kókshetaý sý arnasy» kommýnaldyq kásiporynynyń menshiginde 310 shaqyrym sý qubyry bolsa, osy kúnge deıin onyń 120 shaqyrymy aýystyrylǵan. Kásiporyn 2000 zańdy, 57000 jeke tulǵaǵa qyzmet kórsetedi.
