Kókshetaý Smart city júıesine kóshedi
KÓKShETAÝ. QazAqparat - Kókshetaý qalasynda memlekettik-jekeshelik áriptestik sheńberinde 3,8 mıllıard teńgeniń 29 jobasy júzege asyrylady, dep habarlaıdy QazAqparat tilshisi.
Óńirlik kommýnıkatsııalar qyzmetinde ótken brıfıngte Kókshetaý qalasynyń ákimi Ermek Marjyqpaev atap ótkendeı, «Smart city» tujyrymdamasy sonymen qatar, turǵyn úı qurylysy, týrıstik klasterdi damytý salasynda da engizilmek.
«Kókshetaý qalasy týrızmniń ortasynda ornalasqan. Týrıstik klasterdi damytý úshin 2019-2023 jyldarǵa arnalǵan jol kartasy ázirlendi. Onyń basty maqsaty, jol boıyndaǵy servısti damytý, týrısterdi tartý úshin brend jasaý, zamanýı jyly aıaldamalar men aqparattyq taqtaıshalardy ornatý, Qopa kóliniń jaǵasyn damytý, ımıdjdik sharalardy ótkizý. Qalada týrızm salasynda 18 týrıstik fırma jáne 26 qonaqúı jumys isteıdi», - dep atap ótti qala ákimi.
Memleket basshysy mindetteriniń biri - qalanyń ınvestıtsııalyq tartymdylyǵyn arttyrý úshin «Smart city» tujyrymdamasy egizý. Bul baǵytta qoǵamdyq kólikterde elektrondy bılet berý júıesi engizilýde. Qolma qol aqshasyz avtomattandyrylǵan júıede esep aıyrysý «Qolaıly marshrýt» jobasy arqyly júzege asyrylady.
Qala ákiminiń aıtýynsha, Kókshetaýda áleýmettik-ekonomıkalyq damýdyń barlyq negizgi kórsetkishteri oryndalǵan. Ekonomıkanyń naqty sektory turaqty damýda. Ónerkásip oryndary 105,3 mıllıard teńgeniń ónimin shyǵarǵan. Jalpy kólem ındeksi 100,1 paıyzdy qurady. 4 mıllıard 989,1 mıllıon teńgeniń aýyl sharýashylyǵy ónimi óndirildi. Qurylys salasyndaǵy jumys kólemi 17,3 mıllıard teńgege jetip, 164,5 myń sharshy metr turǵyn úı paıdalanýǵa berildi.
«Indýstrııalandyrý kartasy aıasynda «Vektor kombaın zaýyty» seriktestiginiń jobasy júzege asyrylýda. Munda 96 jańa jumys orny ashylady dep kútilýde. Sondaı-aq, atalmysh kartaǵa engizilgent «EurasiaGroupKazakhstan» seriktestiginiń aýyl sharýashylyǵy tehnıkasyn satatyn jáne qyzmet kórsetetin servıstik ortalyǵynyń qurylysy júrgizilýde.«ENKI», «Novopek», «Tabıǵı ónim» seriktestikteriniń kásiporyndary jańǵyrtylýda. «Gormolzavod» kásipornynda irimshik shyǵaratyn jańa jeli iske qosyldy. Bıyl qurǵaq sút óndiretin tseh salynbaqshy», - degen qala ákimi jumys isteıtin shaǵyn kásipkerlik sýbektileriniń sany kóbeıgenin tilge tıek etti.
Sonymen qatar, brıfıngte aıtylǵandaı, ótken jyly Kókshetaý qalasynda bıýdjettik qarjy esebinen 335 páterli 8 turǵyn úı paıdalanýǵa berildi. Bıyl 600 páterli 17 turǵyn úıdi paıdalaýǵa berý josparlanǵan. 200 otbasy «7-20-25» memlekettik ıpotekalyq turǵyn úı baǵdarlamasyna qatysýda.
